विराट कोहली बने सय अर्धशतक पूरा गर्ने एशियाकै पहिलो ब्याट्सम्यान


काठमाडौं । राजस्थान रोयल्सविरुद्धको खेलमा विराट कोहलीले इतिहास रचेका छन् । उनले यो खेलमा बनाएको अर्धशतकले इतिहास रचेको हो । कोहलीले टी–२० मा आफ्नो १०० औं अर्धशतक बनाएका थिए, यो यस्तो उपलब्धी हासिल गर्ने उनी एसियाकै पहिलो ब्याट्सम्यानसमेत बनेका छन् ।
कोहलीभन्दा पहिले अहिलेसम्म कुनै पनि एसियाली खेलाडीले यस्तो उपलब्धी हासिल गर्न सकेका थिएनन् । कोहलीले आईपीएल २०२५ को आफ्नो दोस्रो अर्धशतक राजस्थानविरुद्ध १४.३ ओभरमा बनाएका थिए। यसअघि केकेआरविरुद्धको खेलमा कोहलीले अविजित अर्धशतक बनाएका थिए । यसपछि राजस्थान रोयल्सविरुद्ध कोहलीको ब्याट गर्ज्यो, यस खेलमा उनले ४५ बलमा ६२ रनको उत्कृष्ट अविजित इनिङ खेलेका थिए ।
यस क्रममा कोहलीले ४ चौकासहित २ छक्का प्रहार गरे । कोहलीले १३७.७८ को स्ट्राइक रेटमा ब्याटिङ गरेका हुन् । टी२० मा सबैभन्दा बढी अर्धशतक बनाउने खेलाडीमध्ये डेभिड वार्नरको नाम पहिलो नम्बरमा छन् । उनले हालसम्म १०८ अर्धशतक बनाएका छन् । यसका साथै अब विराट कोहलीले १०० अर्धशतक बनाएर दोस्रो स्थानमा आफ्नो झण्डा फहराएका छन् । तेस्रो स्थानमा ९० अर्धशतक बनाएका बाबर आजम छन् । चौथो नाम जोस बटलरको हो। उनको नाममा ८६ अर्धशतकको रेकर्ड छ ।