नीलकण्ठ नगरपालिका र बेनिघाट रोराङ गाउँपालिका उत्कृष्ट पालिका घोषणा

मेयरसाप डेस्क

काठमाडौं । आर्थिक वर्ष २०८०र८१ मा नीलकण्ठ नगरपालिका धादिङ उत्कृष्ट नगरपालिका घोषणा भएको छ । संघीय मामिला तथा सामान्य प्रशासन मन्त्रालयले आयोजना गरेको कार्यक्रममा सङ्घीय मन्त्री भगवती न्यौपानेले गुणस्तर परीक्षणपश्चातको नतिजा प्रतिवेदन सार्वजनिक गर्दै नीलकण्ठ नगरपालिका प्रथम, खैरहनी नगरपालिका चितवन द्वितीय र तिलोत्तमा नगरपालिका रुपन्देही तृतीय भएको घोषणा गरिन् । 

त्यसैगरी, गाउँपालिकामध्ये बेनिघाट रोराङ गाउँपालिका धादिङ प्रथम, रुरुक्षेत्र गाउँपालिका गुल्मी द्वितीय र अर्जुनचौपारी गाउँपालिका स्याङ्जा तृतीय भएका छन् । मन्त्री न्यौपाने र सचिव रविलाल पन्थले संयुक्त रूपमा गुणस्तर परीक्षणपश्चातको नतिजा प्रतिवेदन सार्वजनिक गर्दै उच्चतम अङ्क प्राप्त गर्ने तीन–तीन वटा गाउँपालिका र नगरपालिकाको नाम सार्वजनिक गरेका छन् । 

मन्त्री न्यौपानेले आजै शुभारम्भ गरिएको स्थानीय शासन कार्यसम्पादन मूल्याङ्कन प्रणालीलाई सबै गाउँपालिका र नगरपालिकाले प्रभावकारी रूपमा कार्यन्वयनमा ल्याई शासकीय अभ्यासको उच्चतम प्रयोग गर्ने विश्वास व्यक्त गरिन् । उनले गाउँपालिका र नगरपालिकाले संस्थागत क्षमता स्वमूल्याङ्कनमार्फत शासकीय अभ्यासमा देखाएको अग्रसरताले सार्वजनिक सेवा प्रवाह, सामाजिक न्याय र सुशासनमा टेवा पुगेको र आज शुभारम्भ भएको नयाँ प्रणालीले गाउँपालिका र नगरपालिकाको शासकीय अभ्यासलाई थप उचाइमा पुर्याउने बताइन् ।

स्थानीय तहको संस्थागत क्षमता स्वमूल्याङ्कन आव २०७६र७७ बाट सुरु गरिएको भएता पनि मन्त्रालयले गुणस्तर परीक्षण गरी नतिजा प्रतिवेदन सार्वजनिक गरेको यो दोस्रोपटक हो । मन्त्रालयले विगतमा कार्यान्वयनमा रहेका स्थानीय तह संस्थागत क्षमता स्वमूल्याङ्कन प्रणाली, स्थानीय तह आर्थिक सुशासन जोखिम मूल्याङ्कन प्रणाली र स्थानीय आर्थिक विकास मूल्याङ्कन प्रणालीलाई एकीकरण गरी आव २०८२र८३ देखि स्थानीय शासन कार्यसम्पादन मूल्याङ्कन प्रणाली कार्यान्वयनमा ल्याएको छ ।