ओली विरोधी खेमासँग हिमचिम बढाउँदै विद्या, ८४ मा ओलीलाई पछार्ने दाऊ (भिडियो समाचार)

मेयरसाप डेस्क

काठमाडौं । गत भदौ ५ गते पूर्वराष्ट्रपति विद्या भण्डारीले काठमाडौंको नयाँ बानेश्वरस्थित लाखेचौर मार्गमा आफ्नो छुट्टै कार्यालय स्थापना गरिन् । एमालेको पार्टी सदस्यताबाट नै बर्खास्तीमा परेकी उनले आफु एमालेकै सदस्य रहेको दाबी गर्दै आएकी छन् । एमालेमै सक्रिय हुने उनको कुरा छ । एमालेकै राजनीति अझ सक्रियताका साथ गर्ने उद्देश्यसहित उनले अघोषित रुपमा आफ्नो पार्टी कार्यालय स्थापना गरेकी थिइन् । ‘मदन भण्डारी ७५औँ जन्मजयन्ती मूल व्यवस्थापन समिति कार्यालय’ को नाममा खोलिएपनि सो कार्यालय एमालेभित्र विद्या गुट चलाउनकै लागि हो भनेर बुझ्दा अन्यथा नहोला । त्यही कार्यालय उद्घाटनका दिन उनले एमाले अध्यक्ष केपी शर्मा ओलीको कडा विरोध गरिन् । ओलीको विरोध मात्रै गरिनन् ओली विरोधीहरुको समर्थनमा पनि आफ्नो धारणा सार्वजनिक गरिन् ।

खासगरी नेकपा९एकीकृत समाजवादी०का अध्यक्ष माधव कुमार नेपाल पतञ्जली जग्गा प्रकरणमा मुछिएपछि नेपाललाई फसाउनका लागि केपी ओलीले खेलेको षड्यन्त्रको रुपमा उक्त पार्टीपंक्तिको बुझाइ छ । राष्ट्रिय स्वतन्त्र पार्टीका सभापति रवि लामिछाने सहकारी ठगीको मुद्दामा नख्खु कारागारमा छन् । सरकारले प्रतिशोध साँधेको रास्वपाको पनि बुझाई छ । यि दुवै नेताको सांसद पद निलम्बन भएको छ ।  यही पृष्ठभूमिलाई इंकित गर्दै पूर्वराष्ट्रपति भण्डारीले आरोप लाग्नसाथ निलम्बन गर्ने गरिएको भन्दै असन्तुष्टि जनाइन् र आफु उनीहरुको पक्षमा रहेको स्पष्ट पारिन् । ‘आरोप लागेर पुष्टि भएको छैन, उसले बोल्न पाउँदैन, निलम्बित भइहाल्छ । निर्वाचित भएर आएका जनप्रतिनिधिले आदर्शअनुसार काम गर्नुपर्छ । तर, आरोप लाग्यो भन्दैमा निलम्बनमा परिहाल्ने व्यवस्था कति लोकतान्त्रिक हो रु,’ भण्डारीले भनेकी थिइन् ।

भण्डारीले रवि लामिछानेको पक्षमा बोलेपछि भण्डारीले ओली विरोधी खेमाको रक्षामा बोलेको भन्दै एमालेभित्र चर्चा, परिचर्चा चलिरहेको छ । नेपालको राजनीतिमा यतिखेर प्रधानमन्त्री केपी शर्मा ओली पक्षधर एक धार र रास्वपा सभापति रवि लामिछाने पक्षधर अर्को धार देखिन्छ । रविलाई थुन्नुपर्छ भन्नेहरु एकापट्टी र रविलाई थुन्नुहुन्न भन्नेहरु अर्कोपटि । प्रधानमन्त्री केपी शर्मा ओलीले स्वभाविक रुपमा रविलाई थुन्नुपर्छ भन्ने भैहाले । विद्याले रविलाई कारागारमा थुनिएकोप्रति प्रश्न उठाएपछि विद्या अब रास्वपा र रवि लामिछाने समर्थकहरुको नजरमा पनि परेकी छन् । यसैको प्रतिक्रिया स्वरुप मंगलबार रवि लामिछानेको प्रतिनिधिको रुपमा रास्वपाका प्रवक्ता मनिष झाले पूर्व राष्ट्रपति विद्या भण्डारीसँग भेटवार्ता गरेका छन् ।

बिहीबार बिहान उनको निवासमा पुगेर प्रवक्ता झाले डेढ घण्टा कुराकानी गरे । वर्तमान असाधारण राजनीतिक अवस्था बारेमा भण्डारीको सरोकार र यसको समाधानको आवश्यक पहलबारे छलफल भएको झाले बताएका छन् । सहकारीको विषयमा समाधान गर्नुको साटो यसलाई अनावश्यक राजनीतिक मुद्दा बनाएको प्रति भण्डारीले सरोकार राखेको र रवि प्रति सद्भाव छ भनेको उनले जानकारी दिए । नयाँ पुस्ता राजनीतिमा आउनु राम्रो हो र त्यसप्रति अभिभावकको भूमिका निर्वाह गर्न आफू तयार रहेको तथा नयाँ पुस्तालाई राजनीतिमा सघाउन तयार रहेको भण्डारीको भनाई उदृत गर्दै प्रवक्ता झाले बताएका छन् । यो भेटसँगै अब एमालेको सक्रिय राजनीतिको थालनी गरेकी भण्डारी र रास्वपाको राजनीतिक सम्बन्ध अघि बढ्ने देखिएको छ । ओली विरोधी कित्तासँग हिमचिम बढाउन थालेको प्रष्ट भएको छ ।

त्यसो त, उनले केही समय अघि केपी शर्मा ओलीको कडा आलोचक काठमाडौँ महानगरपालिकाका मेयर बालेन शाहसँग  पनि भेट गरिन् । गत असार १९ गते उनीहरुका बिच भेटवार्ता भएको जनाइएको छ । बालेन उनलाई भेट्न उनको निवासमै गएको थिए । काठमाडौँ महानगरपालिकाको बजेट ल्याउन सकस परिरहेको बेलामा सहजीकरण गरिदिन भन्दै बालेनले भण्डारीलाई भेटेको चर्चा छ । पछि काठमाडौँ महानगर बजेट ल्याउन सफल भयो पनि, त्यसमा एमाले पंक्ति र विद्या भण्डारीको हात कति छ, उनीहरुले नै बुझ्ने कुरा भयो । तर जो कोहीलाई भेट्न र बोल्न नखोज्ने स्वभावका बालेन शाहले भण्डारीलाई आदरपूर्वक भेट्नुले राजनीतिमा ठुलै अर्थ राखेको छ । भोलि ओलीसँग लड्नु परेपनि नैतिक रुपमा ओली विरोधी कित्ताले भण्डारीलाई साथ दिने देखिएको छ । उनीपनि ओली विरोधीहरुलाई परेको बेलामा साथ दिदैँ आफुलाई पनि परेको बेलामा साथ लिने रणनीतिमा देखिएकी छन् । 

एमालेको आगामी भदौ २० गतेदेखि २२ गतेसम्म हुने विधान महाधिवेशनबाट आफुमाथि पार्टीले लगाएको राजनीतिक प्रतिवन्ध फुकुवा हुनेमा भण्डारी विश्वस्त छिन् । त्यसको निम्ति पार्टी पंक्तिभित्र माहोल पनि बनाइरहेकी छन् । उनका पक्षमा खुल्ने नेता, कार्यकर्ताहरु पनि बढिरहेका छन् । देशको राजनीतिले नयाँ पुस्ता र पुरानो पार्टीहरुको विकल्प खोजिरहेको कुरालाई पनि उनले नजिकबाट नियालीरहेकै छिन् । त्यसो त एमालेको अलोकप्रियता बढ्दै गएका कारण पार्टीलाई बचाउन आफु आउनुपरेको तर्क उनले नेता, कार्यकर्ताहरुका माझ गर्ने गरेकी छन् । ०८४ सालमा हुने आम निर्वाचनमा रास्वपा अथवा अरु कुनै नाममा आउने नयाँ राजनीतिक दलहरु किन नहुन् उनीहरुले पुराना राजनीतिक दलहरुलाई धक्का दिने देखिन्छ । त्यसबेला यि दलहरुको साथ उनलाई चाहिने नै छ । कथम्कदाचित् विधान महाधिवेशनबाट पनि आफ्नो सदस्यता नविकरणको विषय फुकुवा गर्न सम्भव नभएमा उनले पनि वैकल्पिक राजनीतिक दलमार्फत् नै सक्रिय राजनीतिमा आउनुको विकल्प छैन । यो विकल्पमा जानुपर्ने ओलीलाई पछार्ने शक्ति र रणनीतिका साथ उनी अघि बढ्ने निश्चित छ । त्यसैले उनी मिसन ०८४ लाई नजिकबाट नियालीरहेकी देखिन्छिन् । ओलीलाई संसदीय राजनीतिबाट पछार्ने दाऊमा छिन् भन्दा फरक नपर्ला ।