तनहुँमा ८६३ मेट्रिकटन आलु उत्पादन

मेयरसाप डेस्क

तनहुँ । तनहुँमा आलु प्रवद्र्धन आयोजना कार्यक्रमअन्तर्गत ८६३ मेट्रिकटन आलु उत्पादन भएको छ । आर्थिक वर्ष २०८१/८२ मा १३ वटा कृषक समूहले करिब १ हजार रोपनी क्षेत्रफलमा यो उत्पादन गरेका हुन् ।

कार्यालय प्रमुख गोपाल शर्मा लामिछानेले कृषक समूह र सहकारीमार्फत क्लस्टरमा आलु खेती गरिएको जानकारी दिए । यस कार्यक्रमका लागि ९३ लाख ३० हजार रुपैयाँ बजेट विनियोजन गरिएको थियो । 

प्रत्येक समूहलाई ७५ प्रतिशत अनुदानमा जनकदेव, एमएस र काडिनल जातको ८० क्विन्टल आलुको बीउ उपलब्ध गराइएको थियो ।

साथै, किसानहरूलाई खेतीका लागि आवश्यक उपकरणसमेत प्रदान गरिएको लामिछानेले बताए । यो कार्यक्रमले तनहुँमा आलु उत्पादन बढाउन महत्त्वपूर्ण भूमिका खेलेको छ ।