थाइल्यान्डकी प्रधानमन्त्री सिनावात्रालाई अदालतले गर्‍यो बर्खास्त

मेयरसाप डेस्क

काठमाडौं । थाइल्यान्डको संवैधानिक अदालतले प्रधानमन्त्री पेटोङटार्न सिनावात्रालाई पदबाट हटाएको छ । कम्बोडियाका सिनेट अध्यक्ष हुन सेनसँगको फोन कलमा नैतिकता र संवैधानिक नियम उल्लङ्घन गरेको ठहर गर्दै अदालतले यो फैसला सुनाएको हो ।

फैसलासँगै पेटोङटार्नले एक वर्षदेखि सम्हाल्दै आएको आफ्नो जिम्मेवारी गुमाएकी छन् । जुलाई १ मा उनीविरुद्धको मुद्दामा सुनुवाइ सुरु भएपछि उनलाई निलम्बन गरिएको थियो र उपप्रधानमन्त्री फुमथम वेचाचाईले कार्यवाहकको जिम्मेवारी सम्हालेका थिए ।

पेटोङटार्नले जुन १५ मा हुन सेनसँग गरेको फोन कलले राष्ट्रिय सुरक्षामा असावधानी देखाएको र थाई सेनाका जनरललाई बदनाम गरेको आरोप लगाइएको थियो । यद्यपि, उक्त फोन कल दुई देशबीचको सीमा विवादका कारण बढेको तनाव कम गर्नका लागि गरिएको बताइएको थियो ।

यो फैसलाले पेटोङटार्नको नेतृत्वमा रहेको सत्तारूढ फेउ थाई गठबन्धनलाई अस्थिर बनाएको छ । फोन कल विवादपछि फेउ थाईको ठूलो साझेदार भुमजाइथाई पार्टी गठबन्धनबाट बाहिरिएको थियो । यस कदमले पेटोङटार्नका पिता तथा पूर्वप्रधानमन्त्री थाक्सिन सिनावात्राको राजनीतिक शक्तिलाई पनि झट्का पुगेको छ ।