दक्षिण कोरियाका पूर्वराष्ट्रपति युनकी पत्नी र पूर्वप्रधानमन्त्री दोषी ठहर

मेयरसाप डेस्क

काठमाडौं । दक्षिण कोरियाका अपदस्थ पूर्वराष्ट्रपति युन सुक योलकी पत्नी किम केओन ही र पूर्वप्रधानमन्त्री हान डक–सूलाई विशेष अभियोजकहरूले शुक्रबार दोषी ठहर गरेका छन् । यो निर्णय युनले सन् २०२४ डिसेम्बरमा मार्शल ल घोषणा गरेपछि उत्पन्न राजनीतिक सङ्कटको अनुसन्धानसँग सम्बन्धित छ ।

मार्शल ल घोषणा गरेर विपक्षी बहुमतको संसद्लाई दबाउन खोजेपछि महिनौँ अशान्ति फैलिएको थियो । युनलाई महाभियोग लगाएर अप्रिलमा पदमुक्त गरिएको थियो र गत महिना पुनः पक्राउ गरिएको थियो । नयाँ सरकारले यस प्रकरणको छानबिनका लागि तीन विशेष अभियोजक नियुक्त गरेको थियो ।

विशेष अभियोजक मिन जोङ–कीको टोलीले किममाथि वित्तीय नियम उल्लङ्घन र घुसखोरीको आरोप लगाएको छ । अर्का विशेष अभियोजक चो युन–सुकको टोलीले पूर्वप्रधानमन्त्री हानलाई मार्शल ल लागू गर्न उक्साएको, आधिकारिक कागजात नष्ट गरेको र झूटो बोलेको अभियोग लगाएको छ ।

यस प्रकरणमा पूर्व रक्षामन्त्री किम योङ ह्युनसहित धेरै उच्च अधिकारीमाथि आरोप लागेको छ । हानलाई पक्राउ गर्न अदालतसँग अनुरोध गरिए पनि अदालतले भाग्ने सम्भावना कम भन्दै अस्वीकार गरेको छ ।

युन र किम आपराधिक मुद्दामा एकैपटक जेल जाने पहिलो पूर्वराष्ट्रपति दम्पती बन्ने सम्भावना बढेको छ । आलोचकहरूले युनको मार्शल ल घोषणा किममाथिको भ्रष्टाचारको आरोपबाट ध्यान हटाउने प्रयास रहेको हुन सक्ने प्रश्न उठाएका छन् ।