भोजपुरको खोक्सिकका ६ विपन्न दलित परिवारले पाए नयाँ घर

मेयरसाप डेस्क

भोजपुर । भोजपुरको रामप्रसादराई गाउँपालिका–८ खोक्सिकका ६ विपन्न दलित परिवारले नयाँ घर पाएका छन् । जनता आवास कार्यक्रममार्फत आर्थिक अवस्था कमजोर भएका उनीहरुलाई घर दिइएको हो । 

राज्यले निःशुल्क घर बनाइदिएपछि दैनिकी फेरिएको लाभग्राही तीर्थादेवी कामीले बताइन् । “गरिबीका कारण घर बनाउन सकेका थिएनौँ”, उनले भनिन्, “राज्यकोतर्फबाट नयाँ घर पाउँदा खुसी छु । हाम्रो पुस्तौँ देखिको पीडा अन्त्य भएको छ ।” 

सहरी विकास तथा भवन डिभिजन कार्यालय, धनकुटाबाट आएको बजेटमार्फत घर निर्माण गरिएको वडाले जनाएको छ । वडाध्यक्ष वाचकुमार राईका अनुसार प्रत्येक घर निर्माणमा रु तीन लाख ३६ हजार खर्च भएको छ । घर निर्माणले विपन्न परिवारलाई सुरक्षित आवास र सहज जीवनयापनमा ठूलो टेवा पुगेको उनले बताए ।