नेपाल र भारतबीच देखा परेको समस्या आपसी समझदारीमा मिलाउनुपर्छः मन्त्री चौरसिया

मेयरसाप डेस्क

पर्सा । कानुन, न्याय तथा संसदीय मामिलामन्त्री अजयकुमार चौरसियाले नेपाल र भारतबीच देखापरेको समस्या आपसी समझदारी गरेर मिलाउनुपर्ने बताएका छन् । 

मिडिया फर बोर्डर हार्मोनी, नेपालले आज यहाँ आयोजना गरेको ‘नेपाल–भारत क्रस बोर्डर मिडिया कन्क्लेभ २०२५’ मा उनले दुवै मुुलुकबीच समन्वय र सहकार्य गरेर विवाद टुङ्ग्याउनुपर्ने बताए । मन्त्री चौररियाले भने,“दुवै मुलुकबीच सदियौँदेखि सौहार्द्रपूर्ण सम्बन्ध रहँदै आइरहेको छ । कहिलेकाहीँ सम्बन्धमा उतारचढाव आए पनि समझदारीमार्फत नै टुङ्ग्याउनुपर्ने हुन्छ ।” 

नेपाल र भारतबीचको सम्बन्ध संसारका अन्य कुनै पनि मुलुकमा पाउन नसक्ने उहाँको भनाइ थियो । “दुवै मुलुकका जनताबीचको आत्मीय सम्बन्ध संसारको अन्य कुनै पनि मुलुकमा प्राप्त गर्न सकिँदैन । सञ्चारमाध्यमले दुवै मुलुकलाई तोड्ने नभएर जोड्नेतर्फ अग्रसर हुन जरुरी छ”, कानुनमन्त्री चौरसियाले भने ।  

उनले नेपाल र भारतका नेतृत्वले दुवै देशमा भएका प्रजातान्त्रिक आन्दोलनमा महत्त्वपूर्ण सहयोग र सदासयता देखाएको उल्लेख गर्दै त्यो सम्बन्धलाई थप बलियो बनाउन वर्तमान नेतृत्वले भूमिका खेल्नुपर्नेमा जोड दिए । 

मधेस प्रदेशसभा सदस्य श्याम पटेलले विगतमा नेपाल र भारतबीचको सम्बन्ध निकै सौहार्द्रपूर्ण र सरल भए पनि पछिल्लो समय संवेदनशील बन्दै गइरहेको बताए । दुवै मुलुकबीचको सम्बन्धलाई सौहार्द्रपूर्ण बनाउनका लागि मिडियाले खोजमूलक र सत्यतथ्यमा आधारित भएर समाचार सङ्कलन तथा सम्प्रेषण गर्न जरुरी रहेको उनको भनाइ थियो । 

कार्यक्रममा राष्ट्रिय समाचार समितिका कार्यकारी अध्यक्ष धर्मेन्द्र झाले नेपाल र भारतबीचको सम्बन्ध जनस्तरमा सौहार्द्रपूर्ण र सदासयतापूर्ण रहँदै आएको बताउँदै मिडियाले पनि दुवै मुलुकबीचको सम्बन्धलाई अझै प्रगाढ बनाउन भूमिका खेल्नुपर्नेमा जोड दिए । “नेपाल र भारतबीच जनताको सम्बन्ध मनदेखि नै हुन जरूरी देखिन्छ”, उनले भने, “दुवै मुलुकका मिडियाले समाचार सङ्कलन र सम्प्रेषण मात्रै नभएर पृष्ठपोषणमा पनि ध्यान दिन आवश्यक छ । पृष्ठपोषणले मात्रै प्रभावकारी सञ्चार गराउन मद्दत पु¥याउनेछ ।” 

अग्रज पत्रकार हस्त गुरुङले नेपाल र भारतबीच ‘ग्रासरुट’देखि नै आत्मीय सम्बन्ध विस्तार गर्नुपर्नेमा जोड दिए। पूर्वराजदूत विजयकान्त कर्णले नेपाल र भारतबीच राजनीतिक सीमा भए पनि जनताबीच कुनै पनि प्रकारको सीमा नरहेको धारणा राखे । 

मिडिया फर बोर्डर हार्मोनी, नेपालका अध्यक्ष अनिल तिवारीले कार्यक्रमले दुवै मुलुकका मिडियाबीच आपसी सम्बन्ध विस्तार र प्रवर्द्धनका लागि सहयोगी भूमिका निर्वाह गर्ने बताए ।     मिडिया फर बोर्डर हार्मोनी, भारतका अध्यक्ष अमरेन्द्र तिवारीले सञ्चारमाध्यमले सदियौँदेखि दुई मुलुकबीचको सम्बन्धलाई सहज र प्रभावकारी ढङ्गले सम्प्रेषण गर्नुपर्ने बताए । 

मिडिया कन्क्लेभमा दुवै मुलुकका सम्पादक, सञ्चारकर्मी, सञ्चारक्षेत्रका विज्ञ, नीति निर्माता, डिजिटल कन्टेन्ट क्रियटर्सलगायत १०० जनाको सहभागिता रहेको महासचिव रितेश त्रिपाठीले जानकारी दिए ।