‘क्यान्भास’मा काठमाडौं महानगरपालिका वडा नं २२ का सम्पदा

मेयरसाप डेस्क

काठमाडौं । काठमाडौं महानगरपालिका–२२ मा रहेका सम्पदालाई ‘क्यान्भास’मा उतारिएको छ । सम्पदालाई संरक्षण र प्रवर्द्धन गरी जीवन्त राख्ने उद्देश्यका साथ काठमाडौं–२२ ले २५ जना कलाकारलाई समावेश गरेर तयार पारिएका चित्रहरू आज धरहरामा प्रदर्शन गरेको हो ।

उक्त प्रदर्शनीमा काठमाडौं महानगरपालिका–२२ का वडाध्यक्ष चिनीकाजी महर्जनले यहाँका मूर्त र अमूर्त सम्पदाहरूले हाम्रो सम्पदा, पहिचान इतिहास र संस्कृति बोकेकाले वडाले यसको संरक्षण र प्रवर्द्धन गर्न थालेको बताए । उनले यी सम्पदाहरूलाई विगतसँग जोड्ने मात्रै होइन वर्तमानलाई समृद्ध बनाउने र भविष्यलाई मार्गदर्शन गर्ने आधार पनि प्रदान गर्ने विश्वास व्यक्त गरे ।

कामपा–२२ वडामा रहेका मूर्त र अमूर्त सम्पदाको दृश्यात्मक अभिलेख तयार पार्ने, सम्पदाको इतिहास सांस्कृतिक र सामाजिक सन्दर्भलाई उजागर गर्ने, स्थानीय समुदायलाई सम्पदा संरक्षणमा सक्रिय बनाउने, भावी पुस्ताका लागि ज्ञानको स्रोत तयार पार्ने, यहाँका ऐतिहासिक स्थलको प्रचारप्रसार गर्ने उद्देश्यले कला सिर्जना गरिएको वडाध्यक्ष महर्जनले उल्लेख गरे ।

कलाकारहरूले तेबहाल, महाङ्काल, छत्रचण्डेश्वर, सङ्कटा, भद्रकाली, जुद्धशमशेर र जुद्ध दमकल, चीभाः र संस्कार, रणमुक्तेश्वर, नासः फल्चा, सुनधारा, तलेजु भवानी, भैरव, धरहरा र सुन्धारा, श्वेत गणेश, चीधं बहाः, गणेशककुमार र खड्ग, गणेशर कलश, बौद्ध स्तूपा, प्रकृतिलगायत विषयमा चित्रकला सिर्जना गरेका छन् । ती चित्रहरूको आज धरहरामा प्रदर्शन गरिएको हो ।

आजै यी चित्रकला र सम्पदा समेटिएको ‘क्याटलक’ समेत विमोचन गरिएको छ । सभ्यता नेपाः को प्रकाशनमा उक्त ‘क्याटलक’ निकालिएको हो । कार्यक्रममा स्विमिङ (पौडी) तथा उद्घोषण तालिमका सहभागी तथा कलाकारहरूलाई प्रमाणपत्र प्रदान गरी सम्मन गरिएको थियो । 

‘शनिबारीय चित्रकला कार्यशाला अभियान’को सहकार्यमा उक्त कला सिर्जना गरी प्रदर्शन गरिएको वडाध्यक्ष महर्जनले जानकारी दिए । सात वर्षदेखि कलाकारहरूले उक्त अभियान चलाउँदै सम्पदा भएका क्षेत्रमा गएर कला सिर्जना गर्र्दै आइरहेका छन् । 

सोही क्रममा गत वैशाख १३ गते सम्पदा नेवाः संस्थाको आयोजनामा काठमाडौं महानगरपालिका–२२ को सम्पदा क्षेत्रमा पुगेर कलाकारहरूले कला सिर्जना गरेका अभियानका प्रमुख अभियन्ता दिवेश प्रधानले बताए। उनका अनुसार कुल २५ जना कलाकारले उक्त अभियानमा सहभागिता जनाएका थिए । सोही बेला सम्पदा अवलोकन गरी चित्र सिर्जना गरेका चित्रहरू आज यहाँ प्रदर्शन गरिएको उनले जानकारी दिए ।