नोबेल शान्ति पुरस्कारको मुद्दाले बिग्रियो मोदी–ट्रम्प सम्बन्ध

मेयरसाप डेस्क

काठमाडौं । अमेरिकी राष्ट्रपति डोनाल्ड ट्रम्पले गत जुन १७ मा प्रधानमन्त्री नरेन्द्र मोदीसँगको फोन संवादका क्रममा आफूलाई नोबेल शान्ति पुरस्कारका लागि समर्थन गर्न अनुरोध गरेको र मोदीले त्यो अनुरोध अस्वीकार गरेपछि दुई नेताबीचको सम्बन्ध बिग्रिएको न्युयोर्क टाइम्सले एक रिपोर्टमा उल्लेख गरेको छ ।

रिपोर्टका अनुसार, ट्रम्पले भारत र पाकिस्तानबीचको शत्रुता अन्त्य गर्न सहयोग गरेको आधारमा नोबेल पुरस्कारका लागि मनोनयनको अपेक्षा राखेका थिए । उनले फोनमा आफूलाई नोबेल पुरस्कारका लागि पाकिस्तानले मनोनयन गर्न लागेको दाबीसमेत गरेका थिए ।

तर, प्रधानमन्त्री मोदीले भारत र पाकिस्तानबीचको युद्धविराममा अमेरिकाको कुनै भूमिका नरहेको भन्दै ट्रम्पको दाबी खारेज गरेका थिए । भारतको आधिकारिक अडानअनुसार युद्धविराम दुवै देशको प्रत्यक्ष सहमतिमा भएको थियो ।

यो घटनापछि ट्रम्पले भारतमाथि २५ प्रतिशतको पारस्परिक भन्सार शुल्क र रुसबाट तेल खरिद गरेकोमा थप २५ प्रतिशत जरिवाना लगाएर कुल ५० प्रतिशत भन्सार शुल्क लागू गरेको रिपोर्टमा उल्लेख छ ।

फोन कलपछि दुई नेताबीच कुनै संवाद नभएको र आगामी क्वाड शिखर सम्मेलनमा पनि ट्रम्प सहभागी नहुन सक्ने सम्भावना रहेको जनाइएको छ ।

भारतका अधिकारीहरूका अनुसार, ट्रम्पले भारत–पाकिस्तान सम्बन्धको जटिलतालाई पर्याप्त रूपमा बुझेका थिएनन् । यद्यपि, ह्वाइट हाउसका प्रवक्ताले भने ट्रम्पले सम्पर्क गरेको दाबी अस्वीकार गरेका छन् ।