आवश्यक परे सरकारलाई आधा सम्पत्ति दिन तयार छु : मीनबहादुर गुरुङ

मेयरसाप डेस्क

काठमाडौं । ‘जेनजी’ आन्दोलनका क्रममा ठूलो क्षति बेहोरेका भाटभटेनी ग्रुपका सञ्चालक मीनबहादुर गुरुङले सरकारलाई आवश्यक परे आफूले आधा सम्पत्ति दिन तयार रहेको बताएका छन् ।

आइतबार प्रधानमन्त्री सुशीला कार्कीसँगको भेटमा उनले यस्तो प्रतिबद्धता व्यक्त गरेका हुन् । भेटमा गुरुङले तत्काल व्यवसाय पुनःसञ्चालनका लागि सरकारबाट राहत र सुरक्षाको अपेक्षा गरेको बताएका छन् । 

भदौ २४ गतेको प्रदर्शनमा भाटभटेनीका २८ वटा स्टोरमध्ये १२ वटामा पूर्ण क्षति पुगेको थियो भने ९ वटामा तोडफोड भएको थियो । गुरुङले तत्कालका लागि क्षतिग्रस्त स्टोरहरू बन्द रहे पनि १० हजार कर्मचारीमध्ये एक जनालाई पनि ननिकाल्ने र सेवासुविधा कटौती नगर्ने प्रतिबद्धता जनाएका छन् । 

उनले प्रधानमन्त्रीसमक्ष बीमा दाबीको प्रक्रिया छिटो बनाउन र सुरुमै कम्तीमा ५० प्रतिशत भुक्तानीको व्यवस्था गर्न पनि आग्रह गरेका थिए । भाटभटेनी सुपरस्टोरले वार्षिक २७ अर्ब रुपैयाँभन्दा बढीको कारोबार गर्दै आएको छ ।