राजनीतिक कनेक्सनले रोकिएका सबै फाइल खुल्छन् : गृहमन्त्री अर्याल

मेयरसाप डेस्क

काठमाडौं । गृहमन्त्री ओमप्रकाश अर्यालले अब राजनीतिक कनेक्सनका आधारमा रोकिएका सबै अनुसन्धानका फाइलहरू खोल्ने घोषणा गरेका छन् । 

नेपाल प्रहरीको केन्द्रीय अनुसन्धान व्युरो (सीआईबी) को अनुगमनपछि पत्रकारहरूसँग कुरा गर्दै उनले भने, ‘पोलिटिकल कनेक्सनका आधारमा जे कुरा रोकिएको थियो, जे कुरा बिथोलिएको थियो। त्यस्तो अब हुँदैन ।’

उनका अनुसार, यो सरकारको मुख्य म्यान्डेट नै सुशासन हो, जसविना शान्ति सुरक्षा कायम गर्न सकिँदैन र ६ महिनाभित्र चुनाव सम्पन्न गर्न पनि सम्भव हुँदैन । आर्थिक अपराध, वित्तीय अपराध र भ्रष्टाचार सम्बन्धी अनुसन्धानमा आइरहेका सबै अवरोधहरू फुकाउन निर्देशन दिएको उनले बताए ।

जेनजी आन्दोलनका क्रममा सीआईबी कार्यालयमा भएको क्षतिको अवलोकनपश्चात् गृहमन्त्री अर्यालले अनुसन्धान प्रक्रियालाई तीव्रता दिने प्रतिबद्धता व्यक्त गरेका छन् ।