जेन–जी विद्रोहमा माओवादीले निकास दिन सकेन : गिरिराजमणि पोखरेल

मेयरसाप डेस्क

काठमाडौं । नेकपा माओवादी केन्द्रका उपमहासचिव गिरिराजमणि पोखरेलले पार्टीभित्र गम्भीर सङ्कट उत्पन्न भएको भन्दै नारायणकाजी श्रेष्ठ र जनार्दन शर्माले प्रस्तुत गरेका प्रस्तावहरूलाई गुटबन्दी नभई नयाँ दिशा दिने प्रयासका रूपमा लिनुपर्ने बताएका छन् ।

जारी केन्द्रीय समिति बैठकमा शुक्रबार धारणा राख्दै पोखरेलले जेनजी विद्रोहका बेला माओवादीले निकास दिन नसकेको भन्दै आत्मालोचना गरे । उनले आन्दोलनलाई सही दिशा दिन पार्टी असफल भएको र केवल मुद्दामा समर्थन गर्ने भूमिकामा सीमित भएको स्वीकार गरे ।

पोखरेलले पार्टी नवपुँजीवादी दिशामा गएको र नेताहरूको जीवनशैली बदलिएका कारण नयाँ पुस्ताको विद्रोहलाई सम्बोधन गर्न नसकिएको बताए । उनले फरक प्रस्तावहरूले अध्यक्ष प्रचण्डकै रक्षा गर्ने र पार्टीलाई नयाँ दिशामा लैजान सक्ने विश्वास व्यक्त गर्दै, सहकार्य र अभिभावकत्वबाट मात्र सङ्कट समाधान हुने धारणा राखे ।