कपिलवस्तुमा बस दुर्घटना : ३६ यात्रु घाइते, २ जनाको अवस्था गम्भीर

मेयरसाप डेस्क

काठमाडौं । धनगढीबाट काठमाडौँतर्फ आउँदै गरेको यात्रुबाहक बस कपिलवस्तुको वनकसवासामा दुर्घटना हुँदा ३६ जना यात्रु घाइते भएका छन् । शनिबार बिहान करिब ५ः३० बजे ना८ख ५७०३ नम्बरको बस सडक छेउमा पल्टिएको वडा प्रहरी कार्यालय चन्द्रौटाले जनाएको छ ।

प्रहरीका अनुसार, घाइतेमध्ये दुई जनाको अवस्था गम्भीर रहेको छ । १६ जना गम्भीर तथा मध्यम घाइतेहरूलाई थप उपचारका लागि बुटवलस्थित प्रादेशिक अस्पतालमा रिफर गरिएको छ । बाँकी २० जनाको उपचार चन्द्रौटास्थित सञ्जीवनी सामुदायिक अस्पतालमा भइरहेको छ ।

दुर्घटनामा कैलाली, कञ्चनपुर, अछाम, डोटी र बैतडी लगायतका जिल्लाका यात्रुहरू घाइते भएका छन् । गम्भीर चोट लागेकाहरूमा कैलालीकी कैलाश कोटी र अछामका रमेश कुवँरसहित अन्य यात्रुहरू छन् ।

एक अन्दाजी २०–२२ वर्षीया महिलाको नाम, थर, वतन नखुलेको र उनको अवस्था बेहोस रहेको तथा गम्भीर चोट लागेको प्रहरीले जनाएको छ । दुर्घटनाबारे थप अनुसन्धान भइरहेको प्रहरीले जानकारी दिएको छ ।