गोली चलाउने आदेश प्रधानमन्त्री र मैले दिएको होइन : रमेश लेखक

मेयरसाप डेस्क

काठमाडौं । जेन–जी आन्दोलनपछि पहिलोपटक आज नेपाली कांग्रेसको पदाधिकारी बैठक मा सहभागी भई पूर्वगृहमन्त्री रमेश लेखक सार्वजनिक भएका छन् । आन्दोलनका क्रममा १९ युवाहरूको गोली लागेर निधन भएपछि उनले सोही दिन राजीनामा दिएका थिए ।

पत्रकारमाझ बोल्दै मातृशोकका कारण बरखी बारेर सेतो वस्त्रमा उपस्थित भएक लेखकले जेन–जी आन्दोलनका दुःखद घटनाहरूप्रति दुःख व्यक्त गरेका छन् । उनले मुलुक अत्यन्त अप्ठ्यारो परिस्थितिमा रहेको बताउँदै जेन–जीको असल मागसहितको प्रदर्शनमा घुसपैठ भएकोले दुःखद घटनाहरू भएको बताए ।

गोली चलाउने आदेश आफू र प्रधानमन्त्रीबाट नभएको उनले स्पष्ट पारे । लेखकले भने, “प्रधानमन्त्री र गृहमन्त्रीले आदेश गरेको कुराहरू आएका छन् । यी विषयहरूमा प्रधानमन्त्री जोसुकै भए पनि, गृहमन्त्री जोसुकै भए पनि प्रधानमन्त्री र गृहमन्त्रीले आदेश गर्ने हुँदैन । कुनै बल प्रयोगको आदेश गरिएको छैन प्रधानमन्त्री र मेरो तर्फबाट ।”

लेखकले यो समय उत्तेजित हुने, आग्रह–पूर्वाग्रह र प्रतिशोध राख्ने नभएको बताए । मुलुकलाई लोकतान्त्रिक मूल्य र मान्यतामा अगाडि बढाउन संविधान र कानुनबमोजिम आ–आफ्नो कार्यसम्पादन गर्नुपर्ने उनको भनाइ छ ।