जिपको ठक्करबाट दुई वर्षीया बालिकाको मृ*त्यु

मेयरसाप डेस्क

लमजुङ । लमजुङमा जिपको ठक्करबाट दुई वर्षीया बालिकाको दुःखद निधन भएको छ । आज क्व्होलासोथार गाउँपालिका–१, बागलुङपानीमा ग१ज ६३०६ नम्बरको बोलेरो जिपले ठक्कर दिँदा सोही ठाउँकी दुई वर्षीया नेरिमा तामाङको मृत्यु भएको जिल्ला प्रहरी कार्यालयले जनाएको छ ।

घलेगाउँबाट बेँसीसहर आउँदै गरेको जिपले ठक्कर दिएपछि गम्भीर घाइते भएकी बालिकालाई तत्कालै बेँसीसहरस्थित प्रदेश अस्पताल पुर्याइएको थियो । तर, उपचारका क्रममा चिकित्सकले उनलाई मृत घोषणा गरेका थिए ।

जिल्ला प्रहरी कार्यालयका सूचना अधिकारी ज्ञानेन्द्र क्षेत्रीका अनुसार प्रहरीले जिप चालक बेँसीसहर–९ का २९ वर्षीय मदन दुलाललाई नियन्त्रणमा लिई घटनाबारे आवश्यक अनुसन्धान सुरु गरेको छ ।

बालिकाको शव अहिले परीक्षण भइरहेको र परीक्षणपश्चात् परिवारलाई बुझाइने प्रहरीले जनाएको छ ।