बारामा सुधार केन्द्रभित्रै कुटपिट गरी एक युवाको हत्या

Mayorsap | ३ महिना अगाडि

काठमाडौं । बारामा सुधार केन्द्रभित्रै कुटपिट गरी एक युवाको हत्या गरिएको छ। प्रहरीका अनुसार कलैया उपमहानगरपालिका–९ का ३७ वर्षीय प्रदीपप्रसाद मण्डलको तीन दिनअघि कुटपिट गरी हत्या गरिएको हो। कलैया उपमहानगरपालिका–१ मा सञ्चालित नवजन्म पुनःस्थापना केन्द्रमा फागुन २ गते हत्या भएको हो ।मण्डललाई सुधार केन्द्रका व्यक्ति तथा कर्मचारीहरूले मरणासन्न हुने गरी कुटपिट गरेका थिए। उनलाई कलैया सिटी अस्पतालमा प्रारम्भिक उपचारपछि प्रादेशिक अस्पताल कलैया पठाइएको थियो। उपचारको क्रममा उनको मृत्यु भएको प्रहरीले जनाएको छ।

घटनामा संलग्न रहेको आरोपमा प्रहरीले सात जनालाई पक्राउ गरेको छ। पक्राउ पर्नेमा कलैया–३ का १९ वर्षीय सरफराज मन्सुर, कलैया–४ का २२ वर्षीय निरज सर्राफ, वडा नम्बर ६ का २० वर्षीय आशु मिया शेख, वडा नम्बर १ का २४ वर्षीय अरुण सर्राफ, २ नम्बर वडाका २१ वर्षीय प्रमेश्वर साह, सोही ठाउँका १९ वर्षीय सागर गुप्ता र ३ नम्बर वडाका २९ वर्षीय तमन्ना अलि रहेका छन् ।  पक्राउ परेकाहरूलाई कर्तव्य ज्यान मुद्दामा अनुसन्धान थालिएको बारा प्रहरीले जनाएको छ ।