महिला अधिकारका लागि तीनै तहका सरकार गम्भीर हुनु जरुरी छ: सभामुख मण्डल
मेयरसाप डेस्क | ६ घण्टा अगाडि 
धनुषा । मधेस प्रदेश सभाका सभामुख रामचन्द्र मण्डलले महिलाको हकअधिकार तथा सुरक्षाको विषयमा तीनै तहका सरकार गम्भीर हुन जरुरी रहेको बताएका छन्।
जनकपुरधाममा आज मधेश प्रदेश सभाका सदस्यहरुसँग प्रदेश सभाका समितिको काम, कर्तव्य र अधिकारसम्बन्धी छलफल कार्यक्रममा सभामुख मण्डलले विगतको तुलनामा राजनीतिक प्रशासनिकलगायत क्षेत्रमा महिलाको सहभागिता बढ्दै गएको बताए । महिलाको सम्मान र इज्जत गर्नु प्रत्येक नागरिकको कर्तव्य भएको उल्लेख गर्दै उनले महिला सशक्तिकरणमार्फत महिलालाई आत्मनिर्भर बनाउनु आवश्यकता रहेको बताए।
सभामुख मण्डलले महिला सङ्कीर्ण विचारबाट माथि उठेर उच्च आत्मविश्वास र हौसलापुर्ण तरिकाले अगाडि बढ्नुपर्ने बताए।
छलफलमा नेपाली कांग्रेसका केन्द्रीय सदस्य एवं पूर्वसांसद पुष्पा भुषालले आर्थिक तथा सामाजिक रूपमा पछाडि परेका महिलाको उत्थानमा राज्यले गम्भीरतापूर्वक सोच्नुपर्ने बताए। साथै उनले महिलाको हक अधिकारका लागि शिक्षा, स्वास्थ्य र रोजगारीमा तीनै तहको सरकारले जोड दिनुपर्ने बताए ।
कार्यक्रममा विभिन्न दलका नेता, सांसद तथा नागरिक समाजका अगुवाहरुको सहभागिता थियो । ‘सशक्त महिला, समृद्ध नेपाल परियोजनाअन्तर्गत फोरम फर वीमेन, ल’ एन्ड डेभलपमेन्ट, महिला कानुन र विकास मञ्चको आयोजनामा कार्यक्रम भएको हो ।
