माओवादी कार्यालयमा शिक्षकहरुको धर्ना, विधेयक सच्याउन माग

मेयरसाप डेस्क

काठमाडौं । नेपाल शिक्षक महासंघले विद्यालय शिक्षा विधेयकमा असन्तुष्टि जनाउँदै आज नेकपा (माओवादी केन्द्र) को पार्टी कार्यालय, कोटेश्वरमा धर्ना दिएको छ । 

बुधबार कांग्रेस र बिहीबार एमालेको कार्यालयमा धर्ना दिएपछि महासंघले आज माओवादी केन्द्रको कार्यालयमा पनि दबाब दिएको हो ।

महासंघले विधेयकमा भएका अस्थायी शिक्षकको पदपूर्ति (जसमा ७५% आन्तरिक र २५% खुला हुनुपर्ने माग छ), स्थायी शिक्षकको बढुवा, अस्थायी अवधिको गणना, र अध्यापन अनुमतिपत्रको म्याद थपजस्ता प्रावधानहरू सच्याउन माग गरेको छ ।

यसैगरी, महासंघले विद्यालय कर्मचारी र बाल कक्षा शिक्षकको पद तथा सेवासुविधा निश्चित गर्नुपर्ने र शिक्षक दरबन्दी स्थानीय तहमा हस्तान्तरण गर्ने प्रावधानको विरोध गरेको छ ।

शिक्षण काउन्सिलमा महासंघको प्रतिनिधित्व सुनिश्चित गर्नुपर्ने माग पनि उनीहरूको रहेको छ । महासंघले सरकारलाई यी सबै विषयहरूलाई सहमति अनुसार विधेयकमा समावेश गर्न आग्रह गरेको छ ।