सरकारले हैजा नियन्त्रणलाई प्राथमिकता दिनुपर्छ : महामन्त्री थापा

मेयरसाप डेस्क

वीरगञ्ज । नेपाली कांग्रेसका महामन्त्री गगनकुमार थापाले वीरगञ्ज आसपासमा देखिएको हैजा सङ्क्रमण नियन्त्रण गर्न आवश्यक औषधि र जनशक्ति तयारी अवस्थामा राख्न अस्पताल प्रशासनलाई आग्रह गरेका छन् ।

आज नारायणी अस्पतालमा हैजाका बिरामीहरू र उनीहरूका आफन्तसँग भेटघाट गरेपछि अस्पताल प्रशासनसँगको छलफलमा उनले हैजाका बिरामीलाई निःशुल्क र गुणस्तरीय स्वास्थ्य सेवा प्रदान गर्न कुनै कमीकमजोरी नगर्न अनुरोध गरे ।

महामन्त्री थापाले आफू काठमाडौँ फर्केपछि स्वास्थ्य तथा जनसङ्ख्यामन्त्री र अन्य सम्बन्धित निकायहरूसँग समन्वय गरेर आवश्यक सहयोग जुटाउने प्रतिबद्धता व्यक्त गरे ।

उनले अस्पतालको सरसफाइमा विशेष ध्यान दिन पनि आग्रह गर्दै सरकारी र निजी अस्पतालको सेवामा सरसफाइ मुख्य फरक रहेको बताए ।

नारायणी अस्पताललाई यस क्षेत्रको आशा र भरोसाको केन्द्रका रूपमा विकास गर्न सबैले सहयोग गर्नुपर्ने उनको भनाइ थियो ।

अस्पतालको पूर्वाधार निर्माणमा देखिएको समस्या समाधान गर्न आफू जुनसुकै सहयोग गर्न तयार रहेको उनले बताए ।