आफूलाई गृह मन्त्रालयको जिम्मा दिन सांसद साहको माग

मेयरसाप डेस्क

काठमाडौं । नेकपा एमालेका सांसद किरणकुमार साहले मुलुकमा सुशासन कायम हुन नसकेको भन्दै गृहमन्त्रीको कडा आलोचना गरेका छन् ।

उनले यदि गृहमन्त्रीसँग मन्त्रालय चलाउने क्षमता नभए आफूलाई एक महिनाका लागि गृह मन्त्रालयको जिम्मेवारी दिन माग गरेका छन् ।

शुक्रबार प्रतिनिधिसभा बैठकमा बोल्दै सांसद साहले मुलुकमा हत्या र लुटपाट जस्ता आपराधिक घटना बढिरहेको र सरकार कानुन कार्यान्वयनमा असफल भएको आरोप लगाए ।

उनले भने, ‘यदि गृहमन्त्रीसँग मन्त्रालय चलाउने क्षमता छैन भने त्यो मन्त्रालय मलाई दिनुस्। एक महिनाका लागि दिनुहोस्, म देखाउँछु सुशासन र कानुनी शासन भनेको के हो।’

साहले आफू सफल नभए सांसद पदबाट राजीनामा दिने प्रतिबद्धतासमेत व्यक्त गरेका छन् ।