चीन भ्रमणले नेपालको छवि र प्रतिष्ठा उच्च हुन्छ : प्रधानमन्त्री ओली

मेयरसाप डेस्क

काठमाडौं । प्रधानमन्त्री केपी शर्मा ओली मित्रराष्ट्र चीनका राष्ट्रपति सी चिनफिङको निमन्त्रणामा भोलि, भदौ १४ देखि १८ गतेसम्म चीनको ५ दिने भ्रमणमा जाँदैछन् । चीनको थियानजिन सहरमा हुने शाङ्घाई सहयोग संगठन (एससीओ) को शिखर सम्मेलनमा भाग ओली त्यसतर्फ जाने भएका हुन् ।

आज प्रतिनिधिसभा बैठकमा सम्बोधन गर्दै प्रधानमन्त्री ओलीले एससीओ शिखर सम्मेलनमा नेपालको सहभागिताले अन्तर्राष्ट्रिय मञ्चमा नेपालको दृष्टिकोणलाई स्पष्ट पार्दै मुलुकको छवि र प्रतिष्ठा अभिवृद्धि हुने विश्वास व्यक्त गरे । 

नेपाल सन् २०१६ देखि यस संगठनको संवाद साझेदार रहँदै आएको छ । प्रधानमन्त्री ओलीले भदौ १६ गते हुने एससीओ प्लस शिखर सम्मेलनलाई सम्बोधन गर्नेछन् ।

भ्रमणका क्रममा प्रधानमन्त्री ओलीले चिनियाँ राष्ट्रपति सी चिनफिङ र उपराष्ट्रपति हान झेङसँग द्विपक्षीय भेटवार्ता गर्नेछन् । यसका साथै, उनले रुसी राष्ट्रपति भ्लादिमीर पुटिन, माल्दिभ्सका राष्ट्रपति डा. मोहमद मिज्जु लगायत अन्य राष्ट्र तथा सरकार प्रमुखहरूसँग पनि भेटवार्ता गर्ने कार्यक्रम तय भएको छ ।

भ्रमणको अन्तिम दिन, भदौ १८ गते प्रधानमन्त्री ओली चिनियाँ जनताको जापानी अतिक्रमण विरुद्धको प्रतिरोधी युद्धको ८० औँ वार्षिकोत्सव समारोहमा सहभागी हुनेछन् ।

प्रधानमन्त्री ओलीसँगै उनकी धर्मपत्नी राधिका शाक्य, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, कांग्रेस उपसभापति पूर्णबहादुर खड्का र अन्य उच्च पदस्थ अधिकारीहरू पनि भ्रमण टोलीमा सहभागी हुनेछन् ।