कर्मचारीको उमेरहदबारे मन्त्री न्यौपाने भन्छिन्– ‘मेरो व्यक्तिगत स्वार्थ छैन’

मेयरसाप डेस्क

काठमाडौं । सङ्घीय मामिला तथा सामान्य प्रशासनमन्त्री भगवती न्यौपानेले निजामती कर्मचारीको उमेरहदसम्बन्धी आफ्नो प्रस्ताव कुनै व्यक्तिगत स्वार्थमा आधारित नभएको बताएकी छन् ।

राष्ट्रियसभाको विधायन व्यवस्थापन समितिमा आज भएको छलफलमा उनले कर्मचारीको मनोबल बढाउनका लागि उक्त प्रस्ताव ल्याएको स्पष्ट पारिन् ।

मन्त्री न्यौपानेले सरकार र कर्मचारीबीचको सम्बन्ध सुमधुर हुनुपर्नेमा जोड दिँदै कर्मचारीको अवकाशको उमेरहदको प्रस्तावमा सबै पक्षसँग समझदारी कायम गरेर अघि बढेको उल्लेख गरिन् ।

उनले विधेयकमाथि मत विभाजन गर्ने पक्षमा आफू नरहेको र प्रतिनिधिसभाले पठाएको विधेयकलाई जस्ताको तस्तै पारित गर्नुपर्ने बताइन् ।

मन्त्री न्यौपानेको धारणापछि समितिले कर्मचारीको उमेरहदसम्बन्धी प्रस्ताव सर्वसम्मत रूपमा टुङ्ग्याएको छ । यसअनुसार नयाँ कानुन लागू भएपछिको पहिलो वर्ष ५८ वर्ष पूरा गर्ने कर्मचारीले ५८ वर्षमै अवकाश पाउनेछन् ।

दोस्रो वर्ष ५९ वर्षमा र त्यसपछिका वर्षहरूमा भने ६० वर्षमा अवकाश उमेर लागू हुनेछ । यो विधेयक जारी भएपछि प्रशासनिक सङ्घीयता कार्यान्वयन गर्न सहज हुने मन्त्री न्यौपानेको विश्वास छ ।