राष्ट्रपति पौडेलद्वारा मतदाता नामावली ऐन संशोधन अध्यादेश जारी

मेयरसाप डेस्क

काठमाडौं । राष्ट्रपति रामचन्द्र पौडेलले आगामी फागुन २१ गते हुने प्रतिनिधिसभाको निर्वाचनलाई लक्षित गर्दै ‘मतदाता नामावली ऐन, २०७३’ लाई संशोधन गर्न बनेको अध्यादेश जारी गरेका छन् । अन्तरिम सरकार, मन्त्रिपरिषद्को सिफारिसमा नेपालको संविधानको धारा ११४ को उपधारा (१) बमोजिम उनले उक्त अध्यादेश जारी गरेका हुन् ।

मतदाता नामावली ऐन २०७३ को दफा ४ को उपदफा २ को २ मा  ‘निर्वाचनको मिति घोषणा भइसकेपछि सो निर्वाचनको प्रयोजनका लागि मतदाता नामावलीमा नाम दर्ता गरिने छैन’ भन्ने व्यवस्था थियो । यस व्यवस्थाले निर्वाचनको मिति घोषणा भएपछि नामावली दर्ता गर्ने काम रोकिने हुँदा नयाँ मतदाताहरूले मताधिकारबाट वञ्चित हुनुपर्ने अवस्था थियो ।

यही समस्यालाई सम्बोधन गर्न र नयाँ मतदाताहरूलाई मताधिकारको सुनिश्चितता प्रदान गर्न अन्तरिम सरकारले यो अध्यादेश ल्याएको हो । यो अध्यादेशको कार्यान्वयनपछि थप नागरिकहरूले मतदाता नामावलीमा आफ्नो नाम दर्ता गराएर निर्वाचनमा सहभागी हुन पाउनेछन्, जसले गर्दा निर्वाचन प्रक्रिया थप समावेशी र सहज हुने अपेक्षा गरिएको छ ।