कास्कीमा सार्वजनिक सेवा प्रवाह क्रमशः सहज हुँदै

मेयरसाप डेस्क

गण्डकी । ‘जेनजी’ प्रदर्शनका क्रममा तोडफोड र आगजनीका कारण अवरुद्ध भएका जिल्ला प्रशासन कार्यालय, कास्कीका सेवाहरू क्रमशः सञ्चालनमा आएका छन् । कार्यालयले बुधबारदेखि नयाँ नागरिकता, राहदानी वितरण र भारतीय पेन्सन सिफारिससम्बन्धी सेवाहरू पुनः सुरु गरेको छ ।

प्रमुख जिल्ला अधिकारी रुद्रादेवी शर्माले दिएको जानकारीअनुसार, प्रदर्शनकारीले लगेका केही राहदानीहरू फिर्ता आएका छन् र ती वितरण सुरु गरिएको छ । यस्तै, लेखनाथस्थित इलाका प्रशासन कार्यालयबाट राष्ट्रिय परिचयपत्रको विवरण दर्ता र वितरण पनि सुरु भएको छ ।

प्रजिअ शर्माले प्रतिलिपि नागरिकता, गैरआवासीय नागरिकता, राहदानी आवेदन र नाबालक परिचयपत्रलगायतका अन्य सेवाहरू पनि यथाशीघ्र सुरु गरिने बताएकी छिन् ।

गत भदौ २४ गतेको आन्दोलनमा कार्यालयको भौतिक संरचना, कम्प्युटर र महत्त्वपूर्ण अभिलेखहरू जलेर नष्ट भएका थिए । आगजनीपछि दुईवटा कार्यकक्षबाट मात्रै सेवा प्रवाह भइरहेको र अन्य कार्यकक्षको मर्मतकार्य जारी रहेको कार्यालयले जनाएको छ ।