आफूले आफैँलाई कार्यवाहक अध्यक्ष तोकेपछि...

मेयरसाप डेस्क

काठमाडौं । राष्ट्रिय महिला आयोगमा कार्यवाहक अध्यक्षको विषयलाई लिएर नयाँ विवाद उत्पन्न भएको छ । आयोगकी अध्यक्ष कमलाकुमारी पराजुली विदेश भ्रमणमा रहेको अवस्थामा सदस्य कृष्णकुमारी पौडेल खतिवडाले आफैँलाई कार्यवाहक अध्यक्ष तोकेकी छन् ।

सामान्यतया, अध्यक्षको अनुपस्थितिमा आफैँले कार्यवाहक तोक्ने प्रचलन भए पनि पराजुलीले कसैलाई पनि उक्त जिम्मेवारी नदिएको बताइएको छ । त्यसपछि सदस्य खतिवडाले राष्ट्रिय महिला आयोग ऐन, २०७४ र संविधानको धारा १०१ को उपधारा ६ को प्रावधानलाई उद्धृत गर्दै आफैँलाई कार्यवाहक अध्यक्ष तोकेकी हुन् ।

संविधानको उक्त उपधारामा ‘अध्यक्ष आफ्नो पदको कार्यसम्पादन गर्न नपाउने, विदेश भ्रमणमा गएको वा ७ दिनभन्दा बढी समय बिदामा रहेको अवस्थामा आयोगको वरिष्ठतम सदस्य कार्यवाहक अध्यक्ष हुने’ व्यवस्था छ । तर, उक्त जिम्मेवारी स्वयं आफूले तोक्ने व्यवस्था भने संविधानमा उल्लेख छैन ।