मन्त्री घिसिङ र राजदूत सोङबीच चिनियाँ ठेक्काका आयोजनाबारे छलफल

मेयरसाप डेस्क

काठमाडौं । ऊर्जा, जलस्रोत तथा सिँचाइ, भौतिक पूर्वाधार तथा यातायात एवं सहरी विकासमन्त्री कुलमान घिसिङ र नेपालका लागि चिनियाँ राजदूत चेन सोङ बीच आज शिष्टाचार भेटवार्ता भएको छ ।

सिंहदरबारस्थित भौतिक पूर्वाधार तथा यातायात मन्त्रालयमा भएको भेटमा उनीहरूबीच नेपाल–चीनबीचको सडक तथा विद्युत् प्रसारण लाइन कनेक्टिभिटी लगायतका विषयमा छलफल भयो ।

भेटमा मन्त्री घिसिङले नेपाल–चीनलाई जोड्ने अरनिको र रसुवागढी सडकको स्थायी मर्मतका लागि चिनियाँ प्रविधि प्रयोग गर्न आग्रह गरे । साथै, चिनियाँ अनुदानमा निर्माण हुने काठमाडौं चक्रपथ विस्तारको काम तत्काल सुरु गर्न पनि उनले अनुरोध गरे ।

मन्त्री घिसिङले चिनियाँ कम्पनीहरूले ठेक्का लिएका कमला–कञ्चनपुर, नारायणघाट–बुटवल र मुग्लिन–पोखरा सडकको कामलाई गति दिन सहयोगका लागि पहल गरिदिन पनि राजदूतलाई आग्रह गरे । जवाफमा राजदूत सोङले नेपालको प्राथमिकतामा आधारित रहेर सहयोग गर्न चीन तयार रहेको बताए ।