नेतान्याहुको अमेरिकी भ्रमणअघि प्यालेस्टिनी राज्य मान्यताप्रति तीव्र आलोचना

मेयरसाप डेस्क

काठमाडौं । इजरायलका प्रधानमन्त्री बेन्जामिन नेतान्याहुले संयुक्त राज्य अमेरिकाको भ्रमणअघि प्यालेस्टिनी राज्यलाई मान्यता दिने पश्चिमी नेताहरूको चर्को आलोचना गरेका छन् ।

दुई वर्ष लामो गाजा युद्धको पृष्ठभूमिमा संयुक्त राष्ट्र महासभाको साइडलाइनमा केही पश्चिमी सरकारहरूले प्यालेस्टिनी राज्यलाई मान्यता दिएपछि नेतान्याहुको यो टिप्पणी आएको हो ।

बेन गुरियन विमानस्थलबाट वासिङ्टन प्रस्थान गर्नुअघि उनले भने, ‘म ती नेताहरूको निन्दा गर्नेछु, जसले हत्यारा, बलात्कारी र बालबालिकालाई जलाउनेहरूलाई इजरायलको हृदयमै राज्य दिन चाहन्छन्। यस्तो कहिल्यै हुनेछैन ।’

उनले बेलायत र फ्रान्ससहितका देशहरूको मान्यतालाई ’प्यालेस्टिनी आतङ्कवादप्रति केही नेताहरूको लाजमर्दो आत्मसमर्पण’ भन्दै यसले इजरायललाई कुनै बाध्यता नपार्ने बताए ।

नेतान्याहुले वासिङ्टनमा अमेरिकी राष्ट्रपति डोनाल्ड ट्रम्पसँग चौथोपटक भेट गर्ने र शुक्रबार संयुक्त राष्ट्र महासभामा सम्बोधन गर्ने तयारी छ । उनले ट्रम्पसँग युद्धका लक्ष्यहरू–बन्धकहरूलाई फिर्ता ल्याउन, हमासलाई पराजित गर्न र शान्तिको दायरा विस्तार गर्न–छलफल गर्ने बताए ।

यसैबीच, अमेरिकी दूत स्टिभ विटकफले अरब र इस्लामिक मुलुकहरूलाई ’गाजासम्बन्धी २१–सूत्रीय शान्ति योजना’ प्रस्तुत गरेको जानकारी दिएका छन् । यो योजना इजरायल र क्षेत्रीय छिमेकीहरूको चासोलाई सम्बोधन गर्ने विश्वास उनले व्यक्त गरे ।

यसैबीच, गाजामा इजरायली हवाई आक्रमणले बिहीबार कम्तीमा ११ जनाको ज्यान लिएको क्षेत्रीय नागरिक रक्षा प्रवक्ताले एएफपीलाई जानकारी दिएका छन् । इजरायली सेनाको भूमि आक्रमणका कारण हालैका हप्ताहरूमा लाखौँ मानिस विस्थापित भएका छन् ।