यस्ता छन् मन्त्रिपरिषद् बैठकका १९ निर्णय (सूचीसहित)

मेयरसाप डेस्क

काठमाडौं । सरकारले राजश्व अनुसन्धान विभाग (आरआईडी) र सम्पत्ति शुद्धीकरण अनुसन्धान विभागलाई अर्थ मन्त्रालय मातहत तथा राष्ट्रिय अनुसन्धान विभागलाई गृह मन्त्रालय मातहत सारिएको छ । शुक्रबार सञ्चार मन्त्रालयमा पत्रकार सम्मेलन गर्दै सञ्चार तथा सूचना प्रविधिमन्त्री जगदीश खरेलले बिहीबारको मन्त्रिपरिषद् बैठकका १९ निर्णयहरू सार्वजनिक गरेका हुन् ।

बैठकको महत्त्वपूर्ण निर्णयहरूमध्ये गत भदौ २३ र २४ गते जेनजी प्रदर्शनका क्रममा मृत्यु भएका पहिचान खुलेका नेपाली नागरिकका परिवारलाई प्रति परिवार १५ लाख रुपैयाँ (१० लाख आर्थिक सहायता र ५ लाख काजकिरिया खर्च) उपलब्ध गराउने निर्णय गरिएको छ ।

मन्त्रिपरिषद्ले ’नेपाल सरकार (कार्य विभाजन) (तेस्रो संशोधन) नियमावली, २०८२’ स्वीकृत गरेको छ । यसैगरी, नेपाल बीमा प्राधिकरणको अध्यक्षमा जनकराज शर्मालाई जिम्मेवारी तोकिएको छ भने सञ्चार तथा सूचना प्रविधि मन्त्रीलाई नेपाल सरकारको प्रवक्ता तोकिएको छ ।

ठूला शहरमा ३ करोडभन्दा बढीको घरजग्गा कारोबार गर्दा इजाजत पत्र लिने व्यवस्था लागू गर्ने निर्णयसमेत गरिएको छ । बैठकले विश्व बैंक समूहको वार्षिक बैठकमा अर्थमन्त्रीको भ्रमण स्वीकृत गरेको छ र करिब १ करोड ५१ लाख अमेरिकी डलर बराबरको तीनवटा अन्तर्राष्ट्रिय अनुदान सहायता पनि स्वीकार गर्ने निर्णय गरेको छ ।

प्रशासनिक निर्णयतर्फ, नेपाली सेनाका नौ जना महासेनानीको सहायक रथीमा बढुवा गरिएको छ भने इन्जिनियरिङ सेवामा चिरञ्जिवी चटौत र प्रशासन सेवामा कृष्णप्रसाद काप्रीलाई राजपत्राङ्कित विशिष्ट श्रेणीको सचिव पदमा बढुवा गर्ने निर्णय भएको छ ।

साथै, मन्त्रिपरिषद्का राजनीतिकसहित विभिन्न पाँच समितिहरू गठन गरिएको र दुई जना सहसचिवको राजीनामा स्वीकृत गरिएको जानकारी दिइएको छ ।