युलेन्स स्कुलको अध्यक्षबाट आरजु राणाले दिइन् राजीनामा

मेयरसाप डेस्क

काठमाडौं । निवर्तमान परराष्ट्रमन्त्री तथा कांग्रेस नेतृ आरजु राणा देउवाले युलेन्स स्कुलको व्यवस्थापन समितिको अध्यक्ष पदबाट राजीनामा दिएकी छन् । उनले काठमाडौँ र ललितपुर दुवै स्थानमा रहेको विद्यालयको व्यवस्थापन समितिको अध्यक्ष पदबाट राजीनामा दिएको एक अभिभावकले पुष्टि गरेका छन् ।

गत भदौ २४ गते जेनजी आन्दोलनका क्रममा युलेन्स स्कुलमा तोडफोड र आगजनी भएको थियो, जसबाट विद्यालयको भौतिक संरचना पूर्णरूपमा नष्ट भएको छ । राणा सो विद्यालयको व्यवस्थापन समितिको अध्यक्ष मात्र थिइन् ।

युलेन्स स्कुलले अब जलेर नष्ट भएका भौतिक संरचनालाई ध्यानमा राख्दै नयाँ ढङ्गले विद्यालय चलाउने योजना बनाएको छ । अभिभावक स्रोतका अनुसार, विद्यालयलाई अभिभावकबाटै ट्रष्टी छानेर सञ्चालन गर्ने रोडम्यापअनुसार काम भइरहेको छ ।

हाल अनलाइनबाट कक्षा सञ्चालन भइरहेकोमा कक्षा १० देखि १२ र आइबीको कक्षा दशैँपछि फेस टु फेस सञ्चालन गर्ने तयारी छ । विद्यालयले तीन–चार महिनाभित्र पूर्णरूपमा भौतिक कक्षा सञ्चालन गर्ने योजना बनाएको छ ।