सभा–सम्मेलन शान्तिपूर्ण र उक्साहट नहुनेगरी गर्न गृहको सर्कुलर

मेयरसाप डेस्क

काठमाडौं । गृहमन्त्रालयले अहिलेको अवस्थामा सभा, सम्मेलन र विरोधका कार्यक्रमहरू सञ्चालन गर्दा शान्तिपूर्ण र अन्य पक्षलाई उक्साहट नहुनेगरी गर्न सबैमा अनुरोध गरेको छ ।

मन्त्रालयका प्रवक्ता आनन्द काफ्लेले शनिबार एक विज्ञप्ति जारी गर्दै अहिंसात्मक हुनेगरी र समाजमा शान्ति सुव्यवस्था कायम राख्ने ढंगबाट कार्यक्रम गर्न आग्रह गरेका हुन् ।

गत भदौ २३ र २४ गते जेनजी युवाहरूको अगुवाइमा भएको आन्दोलन पश्चात् नयाँ सरकार गठन भएको र आम निर्वाचनको प्रारम्भिक कार्य सुरु भइसकेको सन्दर्भमा गृह मन्त्रालयले यो सूचना जारी गरेको हो ।

मन्त्रालयले राष्ट्रहित, सुशासन तथा भ्रष्टाचार नियन्त्रण लगायतका मागमा आन्दोलन भए पनि अहिलेको अवस्थामा शान्तिपूर्ण ढंगबाट आफ्ना कार्यक्रमहरू गर्न सबैलाई सहयोगका लागि अपिल गरेको छ ।

यो सर्कुलर विशेषगरी एमालेनिकट युवा संघले आज गर्न लागेको दशैँ भेटघाट कार्यक्रमको पूर्वसन्ध्यामा आएको देखिन्छ ।