गोला–मक्सुरमा अब हरेक घरमा धारो, टर्‍यो खानेपानीको संकट

मेयरसाप डेस्क

सिरहा । कुनै समय खोलाछेउको कुवाबाट घण्टौँ लगाएर पानी ल्याउनुपर्ने बाध्यता झेलेका सिरहाको गोलबजार नगरपालिका–१ र ३ गोला–मक्सुरका ६० घरधुरी अहिले घरघरमै धारा जडान भएपछि लाभान्वित भएका छन् ।

चुरेफेदमा रहेको दलित र जनजाति बाहुल्य यो बस्तीमा गोला मुक्सर खानेपानी आयोजना सम्पन्न भएको हो । यसअघि कुवा सुक्ने, बाढीले बगाउने र इन्धन अभावले जेनेरेटरमा आधारित पुराना खानेपानी योजना बन्द हुने समस्या थियो ।

यो परियोजना गोलबजार नगरपालिका, वेल्थ हङ्गर हिल्फे र सबल नेपालको साझेदारी मा अघि बढेको थियो । आयोजनाको लक्ष्य ’एक घर, एक धारा’ थियो, जसअनुसार घरघरमा आकर्षक चपुत्रासहितका धारा जडान गरिएका छन् । परियोजनाको कूल लागत रु ३७ लाख २६ हजार २६९ रहेको थियो ।

उपभोक्ता समितिका अध्यक्ष प्रेम गगन थापामगरले पाँच दशकपछि बस्तीमा सुरक्षित र भरपर्दो खानेपानी व्यवस्था भएको र गत पुसदेखि पानी वितरण सुरु भएको जानकारी दिए ।

नगरप्रमुख श्यामकुमार श्रेष्ठले पानीको सङ्कट निराकरण गरी जनतालाई पानी खुवाउने नगरको लक्ष्यको यो आयोजना उदाहरण भएको बताएका छन् ।