दशैँको रौनकले गुञ्जायमान म्याग्दीका गाउँघर

मेयरसाप डेस्क

म्याग्दी । दशैँ नजिकिएसँगै रोजगार र व्यवसायका लागि देश–विदेश गएकाहरू गाउँ फर्कन थालेपछि म्याग्दीका ग्रामीण भेगहरूमा चाडपर्वको रौनक बढेको छ । अधिकांश समय बुढापाका मात्र बस्ने गाउँहरू प्रवासी युवाहरूको आगमनले गुञ्जायमान हुन थालेका छन् ।

चाडपर्वलाई लक्षित गरेर गाउँघरको सरसफाइले चिटिक्क पारिएको छ । परम्परागत ढुङ्गे घरहरू कमेरो र रातो माटोले पोतिएका छन् भने पक्की घरमा रङ्गरोगन गरिएको छ ।

वर्खायाममा हिलो र झाडीले ढाकिएका गोरेटो बाटोहरू झारा (श्रमदान) मार्फत मर्मत गरिएको छ । युवाहरू विदेशमा भएकाले श्रमदानमा महिलाको सहभागिता बढी हुने गरेको छ ।

युरोपियन मुलुकबाट बिदामा घर आउनुभएका धवलागिरि गाउँपालिकाका खड्क पुनले हरियाली वातावरण र गाउँघरको सुन्दरताले प्रवासको दुःख मेटाइदिएको बताएका छन् ।

दशैँलाई लक्षित गरेर गाउँघरमा परम्परागत मेला पर्वहरू आयोजना हुन थालेका छन्, जसलाई पछिल्लो समय खेलकुद र कला संस्कृतिको प्रदर्शनीसँग जोड्ने गरिएको छ । यद्यपि, प्रमुख जिल्ला अधिकारी बद्रीप्रसाद तिवारीले मेला पर्वहरू शान्ति सुरक्षामा असर पुग्ने गतिविधि को सुरुवात बिन्दु बन्न सक्ने भन्दै चिन्ता व्यक्त गरे ।

उनले जिल्लामा हुने कतिपय अपराधिक घटनाको सुरुवात युवामा हुने मनमुटाव र झैझगडाबाट हुने गरेको औँल्याए । जिल्ला प्रशासनले शान्ति सुरक्षालाई मजबुत बनाउन चाडपर्व लक्षित सुरक्षा योजना बनाएर प्रहरी परिचालन गर्ने तयारी गरेको जनाएको छ ।