रौतहटमा भारी वर्षाको चेतावनीपछि १०१ घरधुरीलाई सुरक्षित स्थानमा सारियो

मेयरसाप डेस्क

रौतहट । जल तथा मौसम विज्ञान विभागले असोज १७ देखि २० गतेसम्म अति भारी वर्षा हुने चेतावनी जारी गरेसँगै रौतहटमा बागमती र लालबकैया नदी किनारका बस्तीहरूमा बाढीको जोखिम उच्च भएको छ ।

सशस्त्र प्रहरी रौतहटका प्रमुख एसपी राम हरी अधिकारीका अनुसार, जिल्ला विपद् व्यवस्थापनको निर्देशनमा असोज १७ गते मात्र वृन्दावन नगरपालिका–१, भोटियाघाट क्षेत्रका १२८ घरधुरीमध्ये १०१ घरधुरीलाई तत्काल सुरक्षित स्थानमा स्थानान्तरण गरिएको छ ।

जोखिमलाई मध्यनजर गर्दै सशस्त्र प्रहरी बलले अग्रिम सतर्कता र उद्धार कार्य अघि बढाएको छ । सशस्त्र प्रहरीका सम्पूर्ण बेस क्याम्पहरूले जोखिमयुक्त बस्तीहरूमा सचेतनामूलक माइकिङ गर्दै स्थानीयलाई सतर्क रहन आग्रह गरेका छन् ।

बागमती र लालबकैया नदी आसपासका भोटियाघाट, कटहरिया, मौलापुर, राजपुर, गुजरा, गरुडा लगायतका क्षेत्रहरूलाई उच्च जोखिम क्षेत्र का रूपमा पहिचान गरिएको छ ।

उद्धारका लागि डुङ्गा, डोरी, जीवनरक्षक ज्याकेट लगायतका उपकरणहरू तयारी अवस्थामा राखिएको छ भने जिल्ला प्रशासन, सशस्त्र प्रहरी, नेपाल प्रहरी, सेना र स्थानीय तहबीच समन्वय गरिएको छ ।