नारायणगढ–काठमाडौं जाने सवारी चितवनमा रोकिए

मेयरसाप डेस्क

चितवन । धादिङको जवाङ खोलामा पहिरोका कारण पृथ्वी राजमार्ग अवरुद्ध भएपछि नारायणगढ हुँदै काठमाडौँ जाने सवारीसाधनलाई चितवनका विभिन्न स्थानमा रोकिएको छ । 

शुक्रबार साँझदेखि परेको वर्षाका कारण जोखिम बढेको भन्दै स्थानीय प्रशासनले ‘स्टपिङ प्लान’ अनुसार सवारीसाधनलाई नियन्त्रणमा राखेको हो ।

जिल्ला प्रहरी कार्यालयका प्रवक्ता प्रहरी नायब उपरीक्षक रवीन्द्र खनालका अनुसार, सवारीसाधनहरूलाई लोथरदेखि फिस्लिङ बजारसम्म फरक–फरक स्थानमा रोकिएको छ । 

सवारीसाधनहरू एकै ठाउँमा रोक्दा मानवीय आवश्यकतासम्बन्धी समस्या आउने भएकाले फिस्लिङ, कुरिन्टार, मुग्लिन, जुगेडी, रामनगर, आँपटारी लगायतका धेरै ठाउँमा व्यवस्थापन गरिएको छ ।

प्रवक्ता खनालले भरतपुर–मुग्लिन–पोखरा सडक खण्ड भने सञ्चालनमा रहेको जानकारी दिए । बाटो पूर्ण रूपमा सञ्चालन नभएसम्म रोकिएका सवारीसाधनलाई तोकिएकै स्थानमा रहन जिल्ला प्रहरी कार्यालयले आग्रह गरेको छ ।