समुद्र मुनिका केबलमा रुसी आक्रमणको आशंका, विश्वको इन्टरनेट बन्द हुने चेतावनी
Mayorsap | एक महिना अगाडि 
एजेन्सी । रूस र पश्चिमी देशहरू बीचको तनावले सम्पूर्ण विश्वको इन्टरनेटलाई ठप्प पार्न सक्ने खतरा औंल्याइएको छ । रुसी आक्रमणपछि टेलिकम कम्पनीहरूले विश्वव्यापी इन्टरनेट बन्द हुने चेतावनी दिएका छन् । बेलायतका टेलिकम कम्पनीहरूले पनडुब्बी केबल नेटवर्कलाई ‘आवश्यक पूर्वाधार’ घोषणा गर्न आग्रह गरेका छन्। नाटो देशका सैन्य प्रमुखले पनि समुद्र मुनिका केबलहरूमा रुसी आक्रमणको आशंकापछि विश्वव्यापी इन्टरनेट ब्ल्याकआउट हुने चेतावनी दिएका छन्।
बेलायतका प्रमुख दूरसञ्चार कम्पनीहरूले उचित संरक्षण र लगानी पाउनका लागि समुद्र मुनि केबल नेटवर्कलाई ‘आवश्यक पूर्वाधार’ घोषणा गर्न सरकारलाई आग्रह गरेका छन्।
यस क्षेत्रमा बढ्दो खतरा र साइबर हमलालाई ध्यानमा राख्दै सरकारले सुरक्षा व्यवस्था मजबुत बनाउनुपर्ने कम्पनीको भनाइ छ । दूरसञ्चार कम्पनीहरूले पनि शत्रुहरूका आक्रमणहरू निरन्तर बढ्दै गएको र सरकारले सुरक्षा उपायहरूलाई थप बलियो बनाउन आवश्यक रहेको बताएका छन्।
टेलिकम कम्पनीहरूले खुला पत्रमा लेखेका छन्, ‘समुद्री केबलहरूमा भएको क्षतिको नतिजा युरोपभन्दा धेरै टाढासम्म फैलिन सक्छ । सम्भावित रूपमा विश्वव्यापी इन्टरनेट र ऊर्जा पूर्वाधार, अन्तर्राष्ट्रिय सञ्चार, वित्तीय लेनदेन र विश्वभरका महत्वपूर्ण सेवाहरूमा बाधा पुर्याउन सक्छ।’
रुस–युक्रेन युद्धपछि युरोपेली देशहरूसँगको ठूलो तनावका कारण समुद्र मुनि फैलिएको इन्टरनेट केबल काट्न सक्ने खतरा उत्तिकै रहेको छ ।
जनवरीमा, रक्षा सचिव जोन हेलीले रूसी केबल आक्रमणको प्रतिक्रियामा अवरोधलाई बढ्दो रूसी आक्रामकताको अर्को उदाहरण भनेका थिए । ‘म पनि राष्ट्रपति पुटिनले यो सन्देश सुन्न चाहन्छु, हामी तपाईंलाई देख्छौं, तपाईं के गरिरहनु भएको छ हामीलाई थाहा छ, र हामी यो देशको रक्षा गर्न कडा कदम चाल्न पछि हट्ने छैनौं,’ उनले भने।
