काभ्रेमा कृत्रिम ताल निर्माण, पर्यटन विकासको आशा

मेयरसाप डेस्क

धुलिखेल । काभ्रेको धुलिखेलस्थित हिले जलजले सामुदायिक वन क्षेत्रभित्र एउटा कृत्रिम ताल निर्माण गरिएको छ । बनेपा नगरपालिका–२, घिमिरेगाउँ नजिकैको थुम्कीखोला र ओख्रेखोलाको सङ्गमस्थलमा यो बहुउद्देश्यीय पर्यटकीय ताल बनाइएको हो ।

ताल निर्माणसँगै अब यस क्षेत्रलाई पर्यटकीय गन्तव्यका रूपमा विकास गर्ने योजना बनाइएको छ । यसअन्तर्गत उद्यान निर्माण र तालमा डुङ्गा सञ्चालन गर्ने तयारी छ । स्थानीयका अनुसार, यसबाट यहाँ आउने पर्यटकका लागि आवश्यक पर्ने सागसब्जी र फलफूल बेचेर स्थानीय बासिन्दाको आम्दानी बढ्ने अपेक्षा गरिएको छ ।

हिले जलजले पर्यटकीय ताल संरक्षण समितिका संयोजक गोपाल घिमिरेका अनुसार, बागमती प्रदेश पर्यटन मन्त्रालयको आर्थिक सहयोगमा यो परियोजना अघि बढेको हो । पहिलो चरणमा बाँध निर्माणको काम सकिएको छ, जसमा ५ करोड ८७ लाख रुपैयाँ खर्च भएको छ ।

विस्तृत परियोजना प्रतिवेदनअनुसार, यस तालमा डुङ्गा सञ्चालन गर्ने र आसपासका क्षेत्रमा पर्यटकका लागि मनोरञ्जनका सुविधाहरू सहितको उद्यान निर्माण गर्ने योजना छ । सम्पूर्ण पर्यटकीय पूर्वाधार निर्माणका लागि करिब १७ करोड रुपैयाँ लागत अनुमान गरिएको छ ।