सशस्त्र प्रहरीलाई उच्च मनोबलका साथ काम गर्न गृहमन्त्रीको निर्देशन

मेयरसाप डेस्क

काठमाडौं । गृहमन्त्री एवं कानुन, न्याय तथा संसदीय मामिला मन्त्री ओमप्रकाश अर्यालले सशस्त्र प्रहरी बलका जवानहरूलाई उच्च मनोबलका साथ कार्यक्षेत्रमा परिचालित हुन निर्देशन दिएका छन् ।

सशस्त्र प्रहरी बलको प्रधान कार्यालय हलचोकको निरीक्षणपछि आयोजित समारोहलाई सम्बोधन गर्दै मन्त्री अर्यालले सशस्त्र प्रहरीले मुलुकका विभिन्न अप्ठ्यारा परिस्थितिमा सफलतापूर्वक चुनौतीको सामना गर्दै आएको बताएका थिए ।

उनले भने, ‘नेपाली जनताको जीवन रक्षा गर्नुभन्दा ठूलो कर्तव्य अरू केही हुन सक्दैन ।’ उनले सशस्त्र प्रहरीलाई सीमा सुरक्षा, राजस्व संकलन, विपद् व्यवस्थापन, सीमापार अपराध नियन्त्रण, अवैध चोरीपैठारी र मानव बेचबिखन नियन्त्रणजस्ता काममा अझ बढी सक्रिय हुन आग्रह गरे ।

समारोहमा सशस्त्र प्रहरी महानिरीक्षक राजु अर्यालले सशस्त्र प्रहरी बल नागरिकको अपेक्षाअनुसार सेवा र सुरक्षा प्रदान गर्न समर्पित रहेको बताए । उनले राजस्व चुहावट नियन्त्रणमा सशस्त्र प्रहरीले प्रभावकारी भूमिका खेलेको उल्लेख गर्दै सीमा क्षेत्रमा जनशक्ति र बोर्डर आउटपोस्ट (बीओपी) को संख्या बढाउन सके थप उपलब्धि हासिल हुने विश्वास व्यक्त गरे ।