तीन दिनपछि नारायणगढ–मुग्लिन सडक एकतर्फी सञ्चालन

मेयरसाप डेस्क

काठमाडौं । गत शुक्रबारदेखि पहिरोले पूर्ण रूपमा अवरुद्ध भएको नारायणगढ–मुग्लिन सडकखण्ड अन्तर्गतको तुइन खोला क्षेत्रको पहिरो हटाइएपछि आज अपराह्न सडक एकतर्फी सञ्चालनमा आएको छ ।

इलाका प्रहरी कार्यालय मुग्लिनका प्रहरी निरीक्षक प्रतीक सिंहका अनुसार, आइतबार बिहान ४ बजेबाट पहिरो पन्छाउने काम सुरु गरिएको थियो, जसपछि अपराह्न सवा ४ बजेबाट सवारीसाधन चल्न थालेका छन् ।

यद्यपि, पहिरो खस्ने क्रम पूर्ण रूपमा नरोकिएकोले बाटो अझै जोखिमपूर्ण रहेको प्रहरीले जनाएको छ । सडक बन्द हुँदा शुक्रबार साँझदेखि सयौं यात्रु सडकमै अलपत्र परेका थिए । सडक विभाग, ट्राफिक प्रहरी र नेपाल प्रहरीको टोली समन्वयमा काम गरिरहेको छ ।