फिलिपिन्समा भ्रष्टाचारविरुद्ध हजारौं प्रदर्शनकारी सडकमा

मेयरसाप डेस्क

एजेन्सी । बाढी नियन्त्रण परियोजनामा सांसद, अधिकारी र व्यवसायीहरू संलग्न भएको भनिएको विशाल भ्रष्टाचार प्रकरणपछि फिलिपिन्सको राजधानी मनिलामा आज हजारौं प्रदर्शनकारीहरू सडकमा उत्रिएका छन् ।

हिंसात्मक प्रदर्शन रोक्नका लागि मनिला पार्क र इड्सा राजमार्गमा हजारौं सुरक्षाकर्मी परिचालन गरिएको छ । आयोजकहरूले यसलाई हालका वर्षहरूमा भएको सबैभन्दा ठूलो भ्रष्टाचारविरोधी प्रदर्शन भनेका छन् ।

अमेरिका र अस्ट्रेलियाका दूतावासहरूले आफ्ना नागरिकलाई प्रदर्शन क्षेत्रबाट टाढा रहन आग्रह गरेका छन् । प्रदर्शनकारीहरूले फिलिपिन्सको झण्डा बोकेर ‘अब छैन, धेरै, तिनीहरूलाई जेलमा हाल’ जस्ता नारा लगाएका थिए र दोषीहरूलाई तत्काल कारबाही गर्न माग गरेका थिए ।

विद्यार्थी नेत्री अल्थिया ट्रिनिडाडका अनुसार, जनता गरिबीमा बाँचिरहेका बेला भ्रष्ट अधिकारीहरूले करको पैसाबाट महँगा गाडी र विदेश यात्रामा खर्च गरिरहेका छन् । उनले आफ्नो बाढीग्रस्त प्रान्तमा धेरै परियोजनाहरूमा खराब गुणस्तर र अनियमितता देखिएको अनुसन्धान भइरहेको पनि बताइन् ।

फिलिपिन्स क्याथोलिक बिशप्स कन्फरेन्सका प्रमुख कार्डिनल पाब्लो भर्जिलियो डेभिडले शान्तिपूर्ण विरोधको आह्वान गर्दै आफूहरूको उद्देश्य लोकतन्त्रलाई बलियो बनाउनु रहेको स्पष्ट पारेका छन् ।

राष्ट्रपति फर्डिनान्ड मार्कोस जुनियरले यसै वर्षको राष्ट्र सम्बोधनमा उक्त काण्डको खुलासा गरेका थिए । सन् २०२२ यताका ९ हजार ८ सय ५५ बाढी नियन्त्रण परियोजनामध्ये धेरैमा ९.५० अर्ब डलर बराबरको अनियमितता भएको बताउँदै उनले एक स्वतन्त्र आयोग गठन गरेका छन् ।

यस प्रकरणपछि सिनेट अध्यक्ष र सभामुखले राजीनामा दिएका छन् भने केही इन्जिनियरहरूलाई बर्खास्त गरी अनुसन्धान अघि बढाइएको छ । दोषीको सम्पत्ति रोक्का गरिने पनि बताइएको छ ।