भुम्लु गाउँपालिकामा जग्गाधनी पहिचान गर्दै लालपुर्जा दिइँदै, ५० वर्षदेखिको समस्या समाधान

हालसम्म ५३१ जग्गाधनीले पाए लालपुर्जा

मेयरसाप डेस्क

काभ्रेपलाञ्चोक । भुम्लु गाउँपालिकाको दुई वडामा करिब पाँच दशकदेखिको लालपुर्जाको समस्या समाधान हुँदै गएको छ । भुम्लुबासीले ५० वर्षपछि लालपुर्जा पाउन थालेका हुन् । यसका लागि जिल्लास्थित नापी र मालपोत कार्यालयका कर्मचारी जग्गाधनीको पहिचान गर्दै लालपुर्जा दिलाउन व्यस्त छन् । 

हालसम्म ५३१ जग्गाधनीलाई लालपुर्जा उपलब्ध गराएको जिल्ला नापी कार्यालयले जनाएको छ। लालपुर्जाविहीन भुम्लुबासीलाई जिल्लास्थित नापी कार्यालय तथा मालपोत कार्यालयको पहलमा प्रक्रिया पुर्याएर औपचारिक रुपमा गत भदौदेखि वितरण गर्न थालिएको हो । 

उनीहरुलाई गत भदौ ३ गते तत्कालीन भूमि व्यवस्था, सहकारी तथा गरिबी निवारणमन्त्री बलराम अधिकारीले लालपुर्जा वितरणको सुरुआत गरेका थिए। विसं २०३२ देखि गाउँपालिकाको (तत्कालीन भुम्लु र फलाँटे गाविस) हालका दुई वडाका बासिन्दा लालपुर्जाको पर्खाइमा थिए । 

प्रारम्भिक चरणमा भुम्लु–७ र ८ का ४३१ जग्गाधनीलाई लालपुर्जा वितरण गरिएको छ । कार्यालयका अनुसार त्यतिबेला वडा नं ७ का १८५ र वडा नं ८ मा २४६ जग्गाधनीलाई जग्गाधनी प्रमाणपुर्जा वितरण गरिएको हो । त्यसयता १०० लालपुर्जा तयार भई वितरण भइरहेको नापी कार्यालयका प्रमुख अशोककुमार भुसालले बताए। उनका अनुसार ‘फिल्ड’ कार्यालयमार्फत प्रमाण पुर्याएर लालपुर्जा वितरण भइरहेको छ । 

भुम्लुको न्यौपाने गाउँका ५२ परिवारको जग्गा पहिचान भएर लालपुर्जा दिने तयारी भइरहेको गाउँपालिकाका अध्यक्ष प्रेमबहादुर भुजेलले जानकारी दिए। समस्या समाधन गर्न नापी कार्यालयले २०७१ जेठ २५ गतेदेखि स्थानीय तहमा नापी टोली खटाएर काम गरिरहेको थियो । विसं २०७६ मङ्सिर २० गते भुम्लु गाउँपालिकामा फिल्ड कार्यालय समेत स्थापना गरिएको थियो । 

साविकको पिपलटार गाविस हुँदादेखि नै खेतीपाती गरिँदै आएको ‘टार’ खेतीयोग्य जमिन पिपलटार गाविस फुट्दा भुम्लुटार र फलाँटे गाविस दुवैमा परेपछि त्यो खेतियोग्य जमिन कुन गाविसले लिने विषयमा विवाद हुँदा २०३२ सालमा नापी गर्न गएको टोली र दुई गाविसका नेतृत्वबीच विवाद भएका कारण नापी टोली फर्किएपछि स्थानीयले लालपुर्जा पाउन सकेका थिएनन् । विसं २०३५ मा नापी टोली पुनः उक्त गाविसमा नापीका लागि जाँदा जग्गाको विषयमा विवाद चर्किएपछि नापी टोली काम नगरी फर्किएको थियो । 

कार्यालयले लालपुर्जा विरतण गरेपछि जग्गासम्बन्धी सबै स्रेस्ता मालपोत कार्यालय, नक्सा, फिल्ड बुक नापी कार्यालयमा ल्याई जग्गा प्रशासनको नयाँ काम सुरु हुने जनाएको छ । केही जग्गाधनीले आफ्नो जग्गाको ‘लगत–भिड्ने’ आवश्यक कागजात नल्याउँदा काम गर्न केही समस्या भइरहेको भुसालले बताए । यस्तै तत्कालीन समयमा उक्त स्थानमा बसेका नागरिक बसाइँसराइ एवं केहीले तिरो तिरेको आधारमा जग्गा बिक्री गरेकाले थप समस्या देखिएको छ । 

उक्त स्थानमा लालपुर्जाको समस्या वर्षौंसम्म समाधान नभएपछि पटक–पटक समस्या समाधान अध्ययन समिति समेत गठन गरिएको थियो । कयौँ पटक सरकारीस्तरबाट ‘फिल्ड भिजिट र अनुगमन–निरीक्षण’ गर्दा पनि यसअघि कुनै निकास निस्कएको थिएन ।