इमरान खान जीवित छन्, देश छोड्ने शर्त मनाउन आइसाेलेसनमा राखिएकाे छ : पीटीआइ सिनेटर खुर्रम जिशान

मेयरसाप डेस्क

एजेन्सी । पाकिस्तान तहरीक–ए–इन्साफ (पिटिआई) का सिनेटर खुर्रम जिशानले पूर्व प्रधानमन्त्री इमरान खानको मृत्यु भएको भन्ने अफवाहलाई पूर्णतः खारेज गर्दै उनी जीवित रहेको र हाल अदियाला जेलमै राखिएको स्पष्ट पारेका छन् । उनका अनुसार इमरान खानलाई पाकिस्तान छोड्न दबाब सिर्जना गर्ने रणनीतिअनुरूप एकान्तवासमा राखिएको छ ।

पाकिस्तानबाट एएनआईसँग कुरा गर्दै पिटिआईका सिनेटर जिशानले इमरान खानको लोकप्रियताले वर्तमान शासन व्यवस्थालाई चुनौती दिइरहेको र यही कारणले उनको कुनै पनि तस्बिर वा भिडियो सार्वजनिक गर्न नदिइएको दाबी गरेका छन् । “उहाँको प्रभाव र जनसमर्थनबाट डराएका कारण नै सत्ताधारीहरूले उहाँलाई पूर्ण रूपमा आइसोलेसनमा राखेका छन्”, पिटिआईका सिनेटर जिशानले भने ।

गत सातादेखि अफगानिस्तानका विभिन्न सामाजिक सञ्जाल खाताहरूमा रावलपिन्डीस्थित जेलभित्र इमरान खानको हत्या भएको दाबी फैलिएको थियो । त्यही समयमा, अदालतको निर्देशन हुँदाहुँदै पनि पाकिस्तानी अधिकारीहरूले उनका बहिनीहरूलाई गत एक महिनादेखि भेट्न नदिएको समाचारसँग उक्त अफवाह जोडिएको थियो, जसले थप शङ्का उत्पन्न गरेको थियो ।

सिनेटर जिशानले भने, “उहाँलाई लगभग एक महिनादेखि एकान्तवासमा राखिएको छ । उहाँको परिवार, कानून व्यवसायी तथा पिटिआई नेतृत्वलाई समेत भेट्न नदिइनु अत्यन्तै दुःखद र मानवीय अधिकारको स्पष्ट उल्लङ्घन हो । उहाँलाई कुनै न कुनै सम्झौताको दबाबमा ल्याउन खोजिएको जस्तो देखिन्छ ।”

अफवाह अन्त्य गर्दै उनले भने, “पछिल्ला केही दिनमा हामीलाई आधिकारिक रूपमा आश्वासन दिइएको छ— इमरान खान जीवित हुनुहुन्छ, अदियाला जेलमै हुनुहुन्छ र उहाँको अवस्था स्थिर छ ।”

पाकिस्तान सरकारले कस्तो प्रकारको सम्झौता गर्न खोजिरहेको छ भन्ने प्रश्नमा सिनेटर जिशानले भने, “उहाँलाई देश छोडेर विदेशमा चुपचाप बस्न भनिएको छ । यदि उहाँ देश बाहिर बस्न सहमत हुनुभयो भने छुट दिन सकिने सङ्केत दिइएको छ । तर इमरान खानले कहिल्यै यस्ता शर्तहरू स्वीकार गर्नुहुन्न । उहाँको राजनीतिक विश्वास र स्वभावले यस्तो सम्झौता सम्भव नै छैन ।”

जेलमा भए पनि इमरान खानको प्रभाव घट्नुको सट्टा बढ्दै गएको सिनेटर जिशानको दाबी छ । उनी भन्छन्, “पिटिआईको जरो पाकिस्तानका युवाहरूमा अत्यन्त बलियो छ । इमरान खानको विचारधारा पुस्तौँ पुस्तासम्म प्रतिध्वनित हुन थालेको छ । कठिन परिस्थितिले असल नेतृत्वलाई अझ उजागर गरिरहेकाले पार्टीको भविष्य उज्ज्वल छ ।”

इमरान खानको कुनै फोटो वा भिडियो किन बाहिर नआएको भन्ने प्रश्नमा पनि सिनेटर जिशानले स्पष्ट पार्दै भने, “सत्ताधारीहरूलाई थाहा छ— एउटा मात्रै तस्बिरले पनि विशाल जनसमर्थन उत्पन्न गर्न सक्छ । यही डरका कारण उहाँको कुनै दृश्य सार्वजनिक हुन दिइएको छैन ।”