बडीमालिकामा ११औँ नगर स्थापना दिवस भव्य रूपमा मनाइँदै

९ वटै वडाका परम्परागत नृत्यको प्रस्तुति

गोविन्द तिमिल्सेना

बाजुरा । बाजुराको बडीमालिका नगरपालिकाले आगामी मङ्सिर १६ गते आफ्नो ११औँ नगर स्थापना दिवस भव्य रूपमा मनाउने तयारी गरेको छ ।

स्थापना दिवसका अवसरमा नगरपालिकाले स्थानीय कला, संस्कृति र भेष भूषा झल्काउने विभिन्न कार्यक्रमहरूको पनि आयोजना गर्ने भएको हाे ।

नगर प्रवक्ता तथा वडा नं. ७ का अध्यक्ष धर्मराज पाध्यायका अनुसार, सुदूर र बाजुराको संस्कृतिलाई प्राथमिकतामा राखेर नगरभित्रका ९ वटै वडाका स्थानीय कला, रीतिरिवाज, भेष भूषा तथा विविध नृत्यहरूको प्रदर्शनी गरिनेछ ।

स्थापना दिवसका प्रमुख आकर्षणहरूमा नगर गीतमा स्थानीय कलाकारहरूको नृत्य प्रस्तुति, वडा स्तरीय झाँकी प्रदर्शन, हरिनो नाच, महिला देउडा, विशुपर्वको गाथा, विवाह मागल भाका, भुवाचाली, गौरा तथा अनन्ते गाथा लगायतका परम्परागत प्रस्तुतिहरू रहनेछन् ।

दिवसकै अवसरमा ‘बडीमालिका नगरपालिकाको कला संस्कृति: हाम्रो पहिचान’ विषयमा मावि स्तरीय नृत्य प्रतियोगिता, स्थानीय पहिरनसहितको पञ्चेबाजा नाच र पालिका कर्मचारीस्तरीय खुला महिला तथा पुरुष भलिबल प्रतियोगिता समेत सञ्चालन हुनेछन् ।

नगरपालिकाले सबै कार्यक्रममा उत्कृष्ट हुनेहरूलाई उचित पुरस्कारको व्यवस्था गरेको जनाएको छ ।