२६ अंकले घट्यो नेप्से, कारोबार रकम ७ अर्ब नाघ्यो

मेयरसाप डेस्क

काठमाडौं । गत साता पाँचै दिन लगातार बढेको नेपाल स्टक एक्सचेन्ज (नेप्से) परिसूचक यस आइतबार दोहोरो अङ्कले घटेको छ । गत साताभरमा ११५ अङ्क जोडेको नेप्सेले आइतबार २६.५१ अङ्क गुमाएको हो ।

बजार बन्द हुँदा नेप्से परिसूचक २६४९ विन्दुमा आइपुगेको छ । नेप्सेले पछिल्ला केही दिनदेखि २६५० देखि २६८० विन्दुमा प्रतिरोधको सामना गरिरहेको थियो र अन्ततः २६९४ विन्दुसम्म पुगेर ओरालो लागेको हो ।

केही समयदेखि उच्च रकमको कारोबार भइरहेका कम्पनीहरूको लाभांश समायोजन भइसकेकाले ती कम्पनीको मूल्य घट्नुले बजारलाई तल धकेलेको विश्लेषण गरिएको छ ।

बजार घटे पनि बिक्री बढ्दा कारोबार रकम भने बढेको छ । बिहीबार ६ अर्ब ६६ करोड रुपैयाँको कारोबार भएकोमा आइतबार सात अर्ब आठ करोड रुपैयाँको कारोबार भएको हो ।

कारोबार भएका १३ वटा समूहमध्ये उत्पादनमूलक र सामूहिक लगानी कोष समूहमा मात्रै सामान्य वृद्धि देखिएको छ ।

बजार घटेको दिनमा पनि पाँच लगानी उपकरण, जसमा सागर डिष्टिलरी, स्वस्तिक लघुवित्त, झापा इनर्जी, श्री नगर एग्रिटेक र निफ्रा ग्रिन इनर्जी डिबेञ्चरको मूल्य करिब १० प्रतिशत बढेर सर्किट ब्रेक लागेको छ ।

आज हिमालयन रि इन्सुरेन्स कम्पनीको करिब २३ करोड रुपैयाँको कारोबार भयो । १० प्रतिशत ब्याजदर भएको नेपाल इन्भेष्टमेन्ट मेगा बैंकको ऋणपत्रको सेयर मूल्य सबैभन्दा धेरै ८.९९ प्रतिशतले घटेको छ ।