निर्वाचन आयोगद्वारा देशभर १६८ नयाँ मतदानस्थल थप

९३ वटा खारेज

मेयरसाप डेस्क

काठमाडौं । आगामी प्रतिनिधिसभा सदस्य निर्वाचनलाई लक्षित गरी निर्वाचन आयोगले मतदाताको पहुँचलाई सरल, सहज र थप व्यवस्थित बनाउन मतदान स्थलहरूको पुनरावलोकन गरेको छ ।

आयोगको आइतबार बसेको बैठकले देशभर १६८ वटा नयाँ मतदान स्थलहरू थप गर्ने निर्णय गरेको प्रवक्ता नारायणप्रसाद भट्टराईले जानकारी दिए । मतदातालाई अपायक परेका, जीर्ण भएका वा प्रयोगमा नरहेका ९३ वटा मतदान स्थलहरू खारेज गरिएका छन् ।

पुनरावलोकनपश्चात् साबिकमा कायम १० हजार ८९२ मतदान स्थलमा समग्रमा ७५ मतदान स्थल थप हुन गई देशभर कुल १० हजार ९६७ मतदान स्थल कायम भएका छन् ।

आयोगले मतदान स्थलको नाम र ठेगानाका त्रुटि सच्याउने, मतदातालाई पायक पर्ने स्थानमा स्थानान्तरण गर्ने र पुराना स्थलका मतदातालाई अर्को स्थलमा समायोजन गर्ने लगायतका कार्यहरू सम्पन्न गरेको जनाएको छ ।