बागमती पेट्रोलियम डिलर्स एशोसिएशनको अध्यक्षमा लामा निर्वाचित, संघर्षदेखि नेतृत्वसम्मको प्रेरणादायी यात्रा

मेयरसाप डेस्क

काठमाडौं । बागमती पेट्रोलियम डिलर्स एशोसिएशनको नयाँ नेतृत्व चयनका लागि सम्पन्न निर्वाचनबाट व्यवसायी तथा समाजसेवी ईश्वर लामा अध्यक्षमा निर्वाचित भएका छन्। शनिबार सम्पन्न निर्वाचनमा लामाले ७७ मत प्राप्त गर्दै आफ्ना निकटतम प्रतिस्पर्धी प्रल्हाद तिमिल्सिनालाई पराजित गरेका हुन्। तिमिल्सिनाले ४२ मत प्राप्त गरे।

लामाको नेतृत्वमा अधिकांश पदमा उनकै प्यानलका उम्मेदवारहरू विजयी भएका छन्। निर्वाचन परिणामसँगै नवनिर्वाचित नेतृत्वले पेट्रोलियम व्यवसायीहरूको हकहित संरक्षण, व्यवसायिक एकता, संस्थागत पारदर्शिता र सुरक्षित व्यवसायिक वातावरण निर्माणलाई प्राथमिकतामा राखेर अघि बढ्ने प्रतिबद्धता व्यक्त गरेको छ।

विशिष्ट उपाध्यक्षमा कुमार श्रेष्ठ, वरिष्ठ उपाध्यक्षमा विष्णुकुमार खड्का, प्रथम उपाध्यक्षमा केशव कासुला र द्वितीय उपाध्यक्षमा नितेश सरिया निर्वाचित भएका छन्। सचिवमा रामप्रसाद तिमिल्सिना, सहसचिवमा पुरुषोत्तम रेग्मी, कोषाध्यक्षमा यसु प्रधान र सह–कोषाध्यक्षमा निकेश घिमिरे निर्वाचित भएका छन्। त्यसैगरी प्रकाशराज खड्का पनि निर्वाचित भएका छन्।

कार्यकारी सदस्यतर्फ महेन्द्र घिमिरे, नवराज लामिछाने, सुगत मानन्धर, शंकर न्यौपाने, विशाल बखती, सुरेश दुवाल श्रेष्ठ र संजयकुमार श्रीवास्तव निर्वाचित भएका छन्।

नवनिर्वाचित अध्यक्ष लामाका लागि यो सफलता केवल एउटा संस्थाको नेतृत्वमा पुगेको उपलब्धि मात्र होइन, लामो संघर्ष, व्यवसायिक अनुभव र सामाजिक सक्रियताबाट प्राप्त एउटा महत्वपूर्ण जिम्मेवारीका रूपमा हेरिएको छ।

सामान्य परिवारदेखि व्यवसायिक नेतृत्वसम्म

काठमाडौंको चन्द्रागिरी नगरपालिका–थानकोटमा सामान्य परिवारमा जन्मिएका ईश्वर लामाले जीवनमा अनेकौँ उतारचढाव पार गर्दै आफ्नो पहिचान निर्माण गरेका हुन्। कुनै समय वैदेशिक रोजगारीमा समेत पुगेका लामा नेपालमै केही गर्नुपर्छ भन्ने सोचका साथ स्वदेश फर्किए। स्वदेश फर्किएपछि व्यवसायमा सक्रिय हुँदै उनले पेट्रोलियम तथा पानी उद्योगसँगै फोटो फ्रेमसम्बन्धी व्यवसायमा समेत आफ्नो संलग्नता विस्तार गरे। झापादेखि काठमाडौंको सतुङ्गलसम्म व्यवसायिक क्षेत्रमा सक्रिय रहँदै उनले आफ्नो व्यवसायिक परिचय स्थापित गरेका छन्।

व्यवसायसँगै सामाजिक क्षेत्रमा समेत सक्रिय लामालाई स्थानीयस्तरमा समाजसेवीका रूपमा चिनिन्छ। चन्द्रागिरी तथा काठमाडौंको पश्चिमी भेगमा सामाजिक समस्या तथा समुदायसँग सम्बन्धित विषयमा समाधान खोज्नुपर्ने अवस्थामा उनको सक्रियता र समन्वयकारी भूमिकालाई महत्वपूर्ण रूपमा लिने गरिन्छ।

राजनीतिमा पनि सक्रिय

व्यवसाय र समाजसेवासँगै ईश्वर लामा नेपाली कांग्रेसको राजनीतिमा समेत सक्रिय छन्। पार्टीको महाधिवेशन प्रतिनिधि तथा महासमिति प्रतिनिधिका रूपमा जिम्मेवारी निर्वाह गरिसकेका लामा नेपाल तरुण दलको क्षेत्रीय सभापतिको भूमिकामा समेत सक्रिय छन्।

राजनीतिलाई केवल पद प्राप्तिको माध्यमभन्दा पनि समाज र समुदायका समस्या समाधान गर्ने माध्यमका रूपमा लिनुपर्ने उनको धारणा रहेको बताइन्छ। यही कारण स्थानीयस्तरमा कुनै समस्या देखिँदा त्यसको समाधानका लागि पहल गर्न सक्ने व्यक्तिका रूपमा उनलाई सम्झिने गरिएको छ।

युवामाझ लोकप्रिय, खेलकुद र नयाँ पुस्तालाई प्रोत्साहन

ईश्वर लामाको अर्को महत्वपूर्ण पक्ष भनेको युवाप्रतिको उनको सकारात्मक दृष्टिकोण हो। विशेषगरी खेलकुद क्षेत्रमा नयाँ पुस्ताका युवाहरूलाई प्रोत्साहन गर्ने, उनीहरूलाई अवसर प्रदान गर्ने र अघि बढ्न प्रेरित गर्ने कार्यमा उनले निरन्तर योगदान दिँदै आएका छन्।

नयाँ पुस्ता, विशेषगरी जेन्जी पुस्ताका युवाहरूसँग समेत उनको राम्रो सम्बन्ध रहेको बताइन्छ। युवाहरूलाई सकारात्मक सोच, उद्यमशीलता र नेतृत्वतर्फ प्रेरित गर्ने उनको शैलीका कारण उनी युवामाझ लोकप्रिय रहेको उनका शुभेच्छुकहरू बताउँछन्।

समुदायमा देखिने समस्या समाधानका लागि अग्रसर हुने, सम्बन्धित पक्षसँग समन्वय गर्ने र समाधानको बाटो खोज्ने उनको सक्रियताले पनि उनलाई स्थानीयस्तरमा छुट्टै पहिचान दिएको छ। कठिन परिस्थितिमा नेतृत्व लिन सक्ने क्षमता र समस्या समाधानमा प्रभावकारी भूमिका निर्वाह गर्न सक्ने व्यक्तिका रूपमा लामालाई उनका सहकर्मी तथा शुभेच्छुकहरूले हेर्ने गरेका छन्।

 अबको चुनौती र अपेक्षा

बागमती पेट्रोलियम डिलर्स एशोसिएशनको अध्यक्षका रूपमा ईश्वर लामासामु अब व्यवसायीका साझा समस्या समाधान गर्ने, व्यवसायिक एकता थप मजबुत बनाउने र राज्यका सम्बन्धित निकायसँग प्रभावकारी समन्वय गर्दै पेट्रोलियम व्यवसायलाई सुरक्षित, व्यवस्थित र मर्यादित बनाउने चुनौती छ।

सामान्य परिवारबाट जीवनको सुरुवात गर्दै वैदेशिक रोजगारीको अनुभव, स्वदेश फर्किएर व्यवसायमा गरेको संघर्ष, समाजसेवा, राजनीतिमा सक्रियता र युवामाझको लोकप्रियतासम्मको उनको यात्रा आफैंमा प्रेरणादायी छ।

अब बागमती प्रदेशका पेट्रोलियम व्यवसायीको नेतृत्व सम्हालेसँगै उनको विगतको अनुभव, संघर्ष र नेतृत्व क्षमताले संस्थालाई नयाँ उचाइमा पुर्‍याउने अपेक्षा गरिएको छ। व्यवसायीको हकहितसँगै सामाजिक उत्तरदायित्व र युवा पुस्ताको प्रोत्साहनलाई समेत सँगसँगै अघि बढाउन सके ईश्वर लामाको नयाँ जिम्मेवारी उनको व्यक्तिगत सफलताभन्दा माथि उठेर समग्र व्यवसायिक समुदायका लागि समेत प्रेरणाको विषय बन्न सक्नेछ।