गगनको कांग्रेसमा नयाँ शक्ति–सन्तुलन, प्रदीप पौडेलको भारी मतसहित जित, चन्द्र भण्डारीलाई उपसभापतिमा सफलता

मेयरसाप डेस्क

काठमाडौं । नेपाली कांग्रेसको १५औँ महाधिवेशनले पार्टीभित्र नयाँ शक्ति–सन्तुलन स्थापित गरेको छ। सभापतिमा गगनकुमार थापा निर्वाचित भएसँगै पदाधिकारीको नतिजाले कसको प्रभाव बढ्यो र कसले धक्का व्यहोर्नुपर्‍यो भन्ने स्पष्ट पारेको छ।

महामन्त्रीमा प्रदीप पौडेलले सर्वाधिक ४ हजार १९४ मत प्राप्त गर्दै जित हासिल गरेका छन्। उदयशमशेर राणा २ हजार ३३० मतसहित महामन्त्री निर्वाचित हुँदा बहालवाला महामन्त्री गुरुराज घिमिरे भने १ हजार ५१३ मतमा सीमित भए। यस नतिजाले कांग्रेसभित्र नयाँ नेतृत्वप्रतिको समर्थन र बदलिँदो राजनीतिक समीकरणलाई संकेत गरेको छ।

विद्यार्थी राजनीतिबाट उदाएका प्रदीप यसअघि महामन्त्रीमा पराजित भएका थिए। यसपटक भारी मतसहित निर्वाचित भएपछि संगठन सुदृढ बनाउने र कार्यकर्ताको अपेक्षा पूरा गर्ने जिम्मेवारी उनको काँधमा आएको छ। त्यस्तै, गुरुराज घिमिरेको पराजयलाई पार्टीभित्रको शक्ति समीकरणमा आएको परिवर्तनका रूपमा हेरिएको छ।

उपसभापतिमा चन्द्र भण्डारीले सर्वाधिक ३ हजार ७३५ मत प्राप्त गर्दै सफलता हासिल गरेका छन्। मधु आचार्य २ हजार ३४२ मतसहित निर्वाचित भए। समावेशी उपसभापतिमा विनोद चौधरीले १ हजार ७४५ मत प्राप्त गरेका छन्। महिला महामन्त्रीमा डिला संग्रौला ३ हजार ११८ मतसहित विजयी भएकी छन्। वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसाल यसअघि नै निर्विरोध निर्वाचित भएका थिए।

चन्द्र भण्डारीको जितलाई लामो राजनीतिक संघर्षपछिको महत्त्वपूर्ण उपलब्धिका रूपमा हेरिएको छ। १४औँ महाधिवेशनमा उपसभापतिमा पराजित भएका भण्डारी यसपटक सर्वाधिक मतसहित नेतृत्व तहमा पुगेका हुन्। अब पार्टीको नीति निर्माण र निर्णय प्रक्रियामा उनको भूमिका महत्त्वपूर्ण हुने अपेक्षा गरिएको छ।

गगन थापाको नेतृत्वमा बनेको नयाँ पदाधिकारी टिममा प्रदीप पौडेलको भारी मत, उदयशमशेर राणाको जित र चन्द्र भण्डारीको सफलता चर्चामा छन्। तर नयाँ नेतृत्व चयन हुँदैमा पार्टीभित्रका चुनौती स्वतः समाधान हुने छैनन्। गुटगत राजनीति अन्त्य गर्ने, संगठनलाई बलियो बनाउने र जनताको विश्वास फर्काउने चुनौती नयाँ नेतृत्वसामु छ।

अब गगन नेतृत्वको कांग्रेसले पार्टीभित्र एकता कायम गर्दै आगामी स्थानीय तथा प्रदेश निर्वाचनमा कस्तो प्रदर्शन गर्छ भन्ने विषयले नयाँ नेतृत्वको प्रभावकारिता निर्धारण गर्नेछ।