बझाङमा बाढी-पहिरोको वितण्डा : घर र मन्दिर पुरिए, अन्नपातसमेत नष्ट
मेयरसाप डेस्क | ५ घण्टा अगाडि 
काठमाडौं । बझाङको बुंगल नगरपालिका–७ मा शनिवार राति वर्षापछि आएको बाढी र पहिरोले भौतिक संरचनामा व्यापक क्षति पुर्याएको छ ।
नगरपालिकाका उपमेयर धनबहादुर बोहराका अनुसार, घट्ठे खोलामा आएको बाढीले स्थानीयका घर, पानी घट्ट, सिँचाइ कुलो र मन्दिरमा क्षति पुगेको छ । यद्यपि, कुनै मानवीय क्षति भने भएको छैन ।
रातभरिको वर्षाका कारण खोलाको मुहानबाट खसेको पहिरो पानीसँग मिसिएर लेदो बनेर बग्दा स्थानीय कृष्णराज जोशीको घर पूर्ण रूपमा पुरिएको छ ।
यस्तै, डिला लोहार र ओकिल लोहारको घर, शौचालय र धान कुट्ने मिलमा पनि क्षति पुगेको छ भने उनीहरूको अन्नपातसमेत नष्ट भएको छ ।
बाढीले ६ वटा पानी घट्ट, तिनका कुलोहरू र करिब आठ वटा सिँचाइ कुलो पूर्ण रूपमा बगाएको छ । वडाध्यक्ष टंकप्रसाद जोशीको पसलभित्र बाढीको लेदो पसेको छ भने स्थानीयको आस्थाको केन्द्रको रूपमा रहेको दहजार मन्दिरको परिसर पनि लेदोले ढाकिएको छ ।
उपमेयर बोहराले बुंगल नगरपालिका बाढी र पहिरो दुवैको हिसाबले उच्च जोखिममा रहेको बताए । नगरपालिकाले अहिले उद्धारका लागि टोली परिचालन गर्ने तयारी गरिरहेको छ ।
