बाउली खोला पुल निर्माण कार्यमा ठेकेदारको लापर्बाही, पाँच वर्षमा पाँच प्रतिशत काम

१६ महिनामा सक्नेगरी निर्माण सुरु भएको पुल पाँच वर्षदेखि अलपत्र

गोविन्द तिमिल्सेना

बाजुरा । बाजुराको बाउली खोलामा निर्माणाधीन पक्की पुल पाँच वर्षदेखि अलपत्र अवस्थामा छ । मार्तडी–कोल्टी सडकखण्डको बाउलीमा निमार्णाधीन पुल ठेकेदारको लापर्बाहीका कारण करिब पाँच वर्षदेखि अलपत्र परेको हो।

१६ महिनाभित्र सम्पन्न गरिसक्नु पर्ने पक्की पुल अहिलेसम्म निर्माण सम्पन्न हुन नसक्दा वर्षेनी समस्या हुने गरेको छ ।सुदुरपश्चिमको गौरवको आयोजनाको रुपमा रहेको मार्तडी-कोल्टी सडकखण्डको बाउलीमा पर्ने पुल अहिले छेदविच्छेद अवस्थामा छ । पुल निर्माणका लागि एकातर्फ सरिया हालिएका छन्, जुन सरिया खोलाले छेदबिच्छेद बनाएको छ । आरसिसि ब्रिज निर्माण सम्झौता भएको पाँच वर्षसम्म पाँच प्रतिशत पनि काम हुन सकेको छैन् । 

टिडि आर जुगल कौसिक जेभिले पुल निमार्णको जिम्मा लिएको थियो । २०७९ फागुन १५ भित्र मोटरेबल पुल निर्माण सक्नेगरी २०७८ कार्तिक १५ गते टिडिआर जुगल कौशिक जेभीले ५ करोड ५८ लाख ८८ हजार २ सय ७० रुपैयाँमा सम्झौता गरेर निमार्णको जिम्मा लिएको थियो । तर निमार्णको जिम्मा लिएको करिब पाँच वर्ष बितिसक्दा पनि निमार्ण कार्य सम्पन्न हुन नसक्दा निमार्णाधीन पुल अलपत्र अवस्थामा परेको हो । 

सम्झौताको अवधिसम्म काम सम्पन्न नभएपछि आर्थिक वर्ष २०८१/८२ फागुनभित्र काम पूरा गर्ने गरी म्याद थप गरिएपनि कामले भने गति लिन नसकेको सडक डिभिजन कार्यालय अछामका प्रमुख नेत्र देवकोटाले बताए । 

पुलको निमार्ण कार्य सम्पन्न नहुँदा यहाँका स्थानीयलाई वर्षेनी समस्या हुँदै आएको बडीमालिका नगरपालिका वडा नम्बर ८ का स्थानीय मान बहादुर ऐडी बताउँछन् । खोलामा पुल नहुँदा बाजुराका चारवटा स्थानीय तहका नागरिक, बडीमालिका–७ र छिमेकी जिल्ला हुम्ला, मुगु, कालिकोटका नागरिकलाई समेत समस्या हुँदै आएको उनले बताए ।