युक्रेन-रूस शान्ति वार्ता : फ्लोरिडामा निर्णायक छलफल

युक्रेनी चिफ अफ स्टाफको राजीनामा

मेयरसाप डेस्क

एजेन्सी । अमेरिकी राष्ट्रपति डोनाल्ड ट्रम्पको आग्रहमा युक्रेन–रूस युद्धमा मध्यस्थताका लागि दवाब बढाइरहेको ट्रम्प प्रशासनका उच्च अधिकारीहरूले यस सप्ताहन्त फ्लोरिडामा युक्रेनी प्रतिनिधिमण्डलसँग निर्णायक वार्ता गरिरहेका छन् ।

यो भेटवार्ताले आगामी दिनमा रूसी राष्ट्रपति भ्लादिमिर पुटिनसँग हुने महत्त्वपूर्ण छलफलका लागि आधार तयार गर्ने लक्ष्य राखेको छ ।

अमेरिकी विदेशमन्त्री मार्को रुबियो, राष्ट्रपति ट्रम्पका विशेष दूत स्टिभ विटकफ र ज्वाइँ जारेड कुशनरले युक्रेनका वार्ताकारहरूसँग प्रस्तावित शान्ति संरचनाको मुख्य बुँदाहरूमा विस्तृत छलफल गरिरहेका छन् ।

यो संवेदनशील वार्ताको पूर्वसन्ध्यामा युक्रेनी राष्ट्रपति भोलोदिमर जेलेन्स्कीले आफ्ना शक्तिशाली चिफ अफ स्टाफ एन्ड्री यर्माकले पदत्याग गरेको घोषणा गरेका छन् । 

यर्माक संयुक्त राज्य अमेरिकासँग चल्दै आएको वार्ताका प्रमुख प्रतिनिधि थिए । भ्रष्टाचारको आरोपमा उहाँको निवासमा छापा मारिएपछि यो आन्तरिक दबाब आएको हो ।

यर्माकको बहिर्गमनपछि राष्ट्रपति जेलेन्स्कीले नयाँ वार्ता टोली गठन गरेका छन्, जसमा युक्रेनका सशस्त्र बलका प्रमुख एन्ड्री हेनाटोभ, विदेशमन्त्री एन्ड्री सिबिहा र सुरक्षा परिषद्का प्रमुख रुस्टेम उमरोभ समावेश छन् ।

ट्रम्पको प्रारम्भिक २८–बुँदे प्रस्तावित योजनामा कूटनीतिज्ञहरूको ध्यान केन्द्रित छ । उक्त ढाँचा रूसपक्षीय मागहरूतर्फ अत्यधिक ढल्किएको भन्दै आलोचना गरिएको थियो ।

यसमा डोनबासको सम्पूर्ण क्षेत्र रूसलाई हस्तान्तरण गर्ने, युक्रेनको सेनाको आकारमा सीमा निर्धारण गर्ने र नाटोमा सदस्यता नदिनेजस्ता प्रावधानहरू समावेश थिए । यद्यपि, केही बुँदामा परिमार्जन भएको सङ्केत वार्ताकारहरूले दिएका छन् ।

वार्ता चलिरहेकै समयमा शनिबार किएभ र आसपासका क्षेत्रमा रूसी ड्रोन तथा क्षेप्यास्त्र आक्रमणमा कम्तीमा तीनजनाको मृत्यु भएको र दर्जनौँ नागरिक घाइते भएको युक्रेनी अधिकारीहरूले जानकारी दिएका छन् ।

जेलेन्स्कीले युक्रेनी प्रतिनिधिमण्डलले ’युद्ध अन्त्यका लागि आवश्यक कदमहरू छिटो र प्रभावकारी रूपमा अघि बढाउनेछ’ भनी आशा व्यक्त गरेका छन् ।